EO Qazaqstannyń «jasyl» energetıkasyna 500 mln evro ınvestıtsııalady

ASTANA. QazAqparat - Sońǵy bes jylda Eýrazııa Odaǵynyń qarjylyq ınstıtýttary Qazaqstannyń «jasyl» energetıka salasyndaǵy jobalaryna 500 mln evro ınvestıtsııalaǵan, dep habarlaıdy QazAqparat HAA tilshisi.

Eýropalyq ınvestıtsııa bankiniń bas hatshysy Klaýs Tremel usynǵan derekterge sáıkes, 100 mln evro kólemindegi sońǵy tranzaktsııa ótken aptada júzege asyrylǵan.

«Biz Qazaqstannan munaı men ýran ǵana jetkizýden (Qazaqstannan Eýropa elderine ýran jetkizý úlesi jalpy kólemniń 21% quraıdy) alshaqtaýǵa tyrysamyz. Jańartylatyn energııa kózderin damytýdy josparlap otyrmyz. Árıne, júzege asqan jáne asyrylyp jatqan jobalar kóp. Sońǵy bes jylda Eýropa qaıta qurý jáne damý banki, Eýropalyq ınvestıtsııa banki taza jáne jańartylatyn energııa kózderi salasyndaǵy jobalardy damytýǵa 500 mln evro kóleminde qarjylandyrýmen qamtamasyz etti. Qazirgi ýaqytta EO energııalyq tıimdi ǵımarattardyń qurylysyna erekshe kóńil bólip otyr», - dep habarlady EO energetıka dırektoratynyń bas dırektorynyń orynbasary Gerasımos Tomas Astanada EKSPO-2017 kórmesi aıasynda ótken forýmda.

Ol Eýropa Odaǵynyń Qazaqstandaǵy iri sheteldik ınvestor ekenin jáne Qazaqstanmen yntymaqtastyq ornatýǵa EO múshe-memleketterdiń qyzyǵýshylyǵy artyp kele jatqanyn atap ótti.

«Astana, sózsiz, jańa jáne ınnovatsııalyq qala. Qazaqstandyq úkimettiń saıasatymen birge damýdyń úlken áleýetine ıe. Alaıda, Astanany ǵana emes, ózge qalalardy da jańǵyrtýǵa jáne qurylys barysyndaǵy ekologııalyq taza sheshimderge nazar aýdarǵan jón. Sondaı-aq, energııalyq tıimdilik ǵımarattar men qalalarǵa ǵana qatysty emes, ony aýyl sharýashylyǵyn damytý, shaǵyn jáne orta kásipkerlik jáne azamattyq qoǵam syndy kez kelgen salada qoldanýǵa bolady», - dep tolyqtyrdy Gerasımos Tomas.