EO Qazaqstannyń iri saýda jáne ınvestıtsııalyq seriktesi — Memleket basshysy
ASTANA. KAZINFORM — Memleket basshysy Eýropalyq Keńes Prezıdenti Antonıý Koshtamen jáne Eýropalyq Komıssııa Prezıdenti Ýrsýla fon der Lıaıenmen kelissózder júrgizdi. Bul týraly Aqordanyń baspasóz qyzmeti habarlady.
Prezıdent Qasym-Jomart Toqaev EO kóshbasshylary Antonıý Koshtamen jáne Ýrsýla fon der Lıaıenmen júrgizgen kelissózder barysynda Qazaqstan men Eýropalyq Odaq arasyndaǵy baılanys ekijaqty yntymaqtastyq tarıhyndaǵy eń joǵary deńgeıge jetkenin atap ótti.
– Ózara senim men qurmetke negizdelgen bizdiń qarym-qatynasymyz shynaıy strategııalyq sıpatqa ıe boldy. Men Brıýsselge san qyrly yntymaqtastyǵymyzdy ortaq múddemiz bar barlyq salada tereńdetý maqsatynda keldim. Jańa ǵana qol qoıylǵan mańyzdy kelisim men memorandýmdar yqpaldastyqty odan ári nyǵaıtýǵa beıil ekenimizdiń aıqyn dáleli. Búgingi kelissóz qorytyndylary Qazaqstan-Eýropa qarym-qatynasynyń jańa kezeńine jol ashady dep senemin, – dedi Memleket basshysy.
Qasym-Jomart Toqaev Qazaqstan men EO arasynda asa joǵary deńgeıdegi turaqty saıası dıalog jolǵa qoıylǵanyn aıtty. Sondaı-aq elimizdiń aımaqta birinshi bolyp EO-men Keńeıtilgen seriktestik jáne yntymaqtastyq jónindegi kelisimge qol qoıyp, ratıfıkatsııalaǵanyn eske saldy.
Memleket basshysy saýda-ekonomıkalyq jáne ınvestıtsııalyq baılanystardy damytýǵa aıryqsha nazar aýdardy.
– Búginde EO Qazaqstannyń iri saýda jáne ınvestıtsııalyq seriktesi sanalady. Eýropalyq kompanııalar ekonomıkamyzdyń túrli salasyna zor úles qosyp keledi. Olardyń tabysy eýropalyq bıznestiń Qazaqstanǵa degen senimin baıqatady. Biz Eýropalyq Odaqtyń Ortalyq Azııadaǵy senimdi seriktesi bolǵanymyzdy maqtan tutamyz. Sondaı-aq eýropalyq ınvestorlar úshin turaqty ári tartymdy ınvestıtsııalyq klımat jasaýǵa umtylamyz, – dedi Prezıdent.
Aıta ketelik Prezıdent Eýropalyq Odaq kóshbasshylarymen kelissóz júrgizýge barǵan edi.
