EO Qazaqstanǵa DSU máseleleri boıynsha qoldaýlaryn jalǵastyra túsetin bolady - N. Jýsten
ASTANA. Naýryzdyń 15-i. QazAqparat /Qanat Mámetqazyuly/ - EO aldaǵy ýaqytta da Qazaqstanǵa DSU máseleleri boıynsha qoldaýlaryn jalǵastyra túsetin bolady. Búgin Parlament Senatynda «Qazaqstannyń Eýropa elderimen saýda-ekonomıkalyq yntymaqtastyǵynyń perspektıvalary» atty taqyrybynda ótken konferentsııa barysynda Eýropalyq Komıssııanyń Qazaqstan Respýblıkasyndaǵy ókildiginiń basshysy Norber Jýsten myrza osylaı málim etti,
dep habarlaıdy QazAqparat.
«Keden odaǵy aıasyndaǵy máselelerge keletin bolsaq, jalpy syrtqy tarıf týraly ortaq túsinik qalyptasty. Osyǵan oraı, qazaqstandyq tarıftiń qurylymy ózgeredi, sondyqtan Qazaqstannyń Keden odaǵy qurylǵanǵa deıingi tarıfterine qaraǵanda jalpy syrtqy tarıfi aıtarlyqtaı joǵary bolady. Bul belgili bir taýarlarǵa baj salyǵy men kvotalardyń kóterilitinin bildiredi. Árıne, bul jaǵymsyz qubylys. Biraq, birqatar taýarlar úshin de burynǵyǵa qaraǵanda tómengi tarıfter qoldanylýy múmkin. Jalpy, bundaı tarıftik alshaqtyq 2015 jylǵa qaraı ońtaılana bastaıdy dep boljanyp otyr. Eýropalyq Komıssııa Keden odaǵy Qazaqstannyń DSU-ǵa kirý ornyn almastyra almaıtyndyǵy týraly málimdemesin qoldaıdy. Sondyqtan da EO aldaǵy ýaqytta Qazaqstanǵa DSU máseleleri boıynsha qoldaýlaryn jalǵastyratyn bolady», dedi N. Jýsten.
Sonymen birge, Ókildik basshysy Qazaqstan men EO arasyndaǵy ǵylymı yntymaqtastyq máselelerin de qozǵady. Onyń aıtýynsha, ǵylym salasyndaǵy yntymaqtastyq elder arasyndaǵy progresstiń negizi bolyp qala beredi.
