EO Qazaqstanda «jasyl» ekonomıkany damytýǵa 7 mln. eýro bóledi
ASTANA. QazAqparat - Búgin Eýropalyq odaqtyń Qazaqstandaǵy Ókildigi, Qazaqstandaǵy BUU Damý baǵdarlamasy, BUU-nyń Eýropalyq ekonomıkalyq komıssııasy jáne Sý resýrstary komıteti «Qazaqstannyń «jasyl» ekonomıka modeline ótýin qoldaý» birlesken jobasyn tanystyrdy.
Atalǵan jobaǵa Eýropalyq odaq 7 mıllıon eýro kóleminde qarjy salyp otyr. Joba sý paıdalaný tıimdiligin arttyrýǵa, ekologııalyq basqarý júıesiniń zamanaýı ádisterin qoldaný jáne osy salada ilki jobalardy júzege asyrýǵa baǵyttalǵan.
«Joba negizinen sýdy tıimdi paıdalaný salasynda júzege asady. Qazaqstan Úkimetiniń alǵan jańa ekonomıkalyq baǵyty ekonomıkany qaıta qurylymdaýǵa negizdelgeni belgili. Alaıda oǵan aýyl sharýashylyǵynda jáne ónerkásipte eńbek ónimdiligin arttyrmaı qol jetkizý qıyn. Bul eki salada da sý kóp paıdalanylatyny bárimizge aıan. Sondyqtan sýdy tıimdi paıdalaný baǵdarlamalaryn oryndaý úlken mańyzǵa ıe bolyp otyr», - deıdi Qazaqstandaǵy BUU Damý baǵdarlamasy ókildiginiń energetıka men qorshaǵan ortany qorǵaý departamentiniń dırektory Rasýl Rahımov.
Onyń aıtýynsha, atalǵan baǵdarlama aıasynda naqty nátıjelerge qol jetkizý kózdelgen.
«Joba aıasynda sýdy tıimdi paıdalanýǵa baǵyttalǵan jańa ekonomıkalyq tetikterdi jasaqtaý jáne engizý josparlanýda. Sonymen qatar jańa ınnovatsııalyq tehnologııalardy engizýge granttar bólinedi. Jobaǵa 4 jyldyń ishinde 7 mln. eýro bólinedi. Barlyq jumystar bıyl shilde-tamyz aılarynda bastalady dep josparlap otyrmyz», - dedi ol.
