EO Izraılge Gaza sektoryndaǵy qorshaýdy alyp tastaýdy usyndy

ASTANA.KAZINFORM — Eýropalyq Odaq (EO) Komıssııasynyń ókili Anvar ál-Anýnı Izraıldi Gaza sektoryna qoıylǵan qorshaýdy joıýǵa jáne bul aımaqqa gýmanıtarlyq kómektiń jetkizilýine ruqsat berýge shaqyrdy, dep habarlaıdy Anadoly. 

Ál-Anýnı kúndelikti ótkiziletin baspasóz konferentsııasynda Gazadaǵy jaǵdaıǵa qatysty málimdeme jasady.

— Biz Gazadaǵy gýmanıtarlyq jaǵdaı týraly kelip jatqan málimetterge  alańdaýlymyz. Onda ýaqytsha bitim kezinde jetkizilgen azyq-túlik qory taýsylyp barady, — dedi ál-Anýnı.

Ol sonymen qatar halyqaralyq gýmanıtarlyq quqyqqa sáıkes, kómek muqtaj beıbit turǵyndarǵa der kezinde jetkizilýi tıis ekenin aıtty.

— Biz Izraılge taǵy da úndeý jasap, Gaza qorshaýyn alyp tastap, bul aımaqqa aýqymdy kólemde gýmanıtarlyq kómek jetkizýge múmkindik berýge shaqyramyz, — dedi ol.

Bitimdi buzyp, Izraıl áskeri Gaza sektoryna qatygez shabýyldaryn qaıta bastady

Izraıl áskeri 18 naýryz tańynda, 19 qańtarda kúshine engen atysty toqtatý rejıminen keıin, Gaza sektoryna qatygez shabýyldaryn qaıta bastady.

Shabýyldar qaıta bastalǵaly beri 2326 palestındik qaza tapty, olardyń kópshiligi — qarttar, áıelder men balalar. Taǵy 650 adam jaralandy.

2023 jylǵy 7 qazannan beri Izraıldiń Gaza sektoryna jasaǵan shabýyldarynan qaza tapqan palestındikter sany 52 418-ge, al jaralanǵandar sany 118 091-ge jetti.

Atysty toqtatý rejımin buzǵan soń, Izraıl HAMAS-qa qarsy «áskerı qýatty kúsheıte otyryp áreket etetinin» málimdedi, sebebi HAMAS atysty toqtatý týraly jańa usynystardy qabyldamaǵan bolatyn.

HAMAS óz málimdemesinde «Izraıl deldal elder aldynda bergen ýádelerin oryndamaı, Gaza sektorynda palestın halqyn qyryp-joıýdy qaıta bastady» dep málimdedi. 

Aıta ketelik Gazaǵa gýmanıtarlyq kómek tasymaldaǵan kemege shabýyl jasalǵan edi.