EO gýmanıtarlyq kómekke 700 mln eýro bóledi: basymdyq kimge beriledi
ASTANA. KAZINFORM – Eýropalyq odaq soǵys pen túrli apattan zardap shekken adamdarǵa gýmanıtarlyq kómek kórsetý úshin 700 mln eýrodan astam (353 mlrd teńgeden astam) qarjy bóledi, dep habarlaıdy Kazinform agenttigi DW basylymyna silteme jasap.
Bul týraly Eýropalyq komıssııa tóraǵasy Ýrsýla fon der Lıaıen málimdegen.
Ásirese, gýmanıtarlyq kómekti bólý kezinde Saharanyń ońtústigindegi Afrıka elderine, sondaı-aq úılerin tastap, basqa jerge kóshýge májbúr bolǵan adamdar men olardy qabyldaǵan qaýymdastyqtarǵa basymdyq beriledi.
Atap aıtqanda, shamamen 380 mln eýro Saharanyń ońtústigindegi Afrıka elderindegi kóshi-qon máselelerine baǵyttalady. Qarjy mıgranttardyń eń osal toptaryn qoldaýǵa, sondaı-aq olardyń otanyna oralýy men qoǵamǵa qaıta beıimdelýine jumsalady.
Taǵy 252 mln eýro – qarýly qaqtyǵystar, halyqtyń májbúrli túrde bosýy, indetter men tabıǵı apattarǵa baılanysty shuǵyl kómek kórsetýge bólinedi. Onyń 97 mln eýrosy Saharanyń ońtústigindegi Afrıka elderine, 103 mln eýrosy – Palestına aýmaqtary men Lıvanǵa, al 52 mln eýrosy – Ýkraınaǵa, onyń ishinde qys maýsymyna daıyndyq jumystaryna baǵyttalady.
Sondaı-aq Afrıkadaǵy Uly kólder óńirine jáne Kongo Demokratııalyq Respýblıkasynyń shyǵysyndaǵy Ebola bezgeginiń taralýyna qarsy kúreske qosymsha qarjy qarastyrylǵan.
Eske salaıyq, buǵan deıin Eýrokomıssııa bıylǵy jyly deportatsııalar kórsetkishi aldyńǵy jyldarmen salystyrǵanda aıtarlyqtaı joǵary bolady dep boljap otyrǵanyn jazǵanbyz.
