EO Grýzııany demokratııalyq joldan shegingeni úshin synǵa aldy

ASTANA. KAZINFORM – Eýropalyq komıssııa kandıdat elderdiń Eýropalyq Odaqqa kirýge daıyndyǵy týraly jyl saıynǵy esebinde Grýzııany oppozıtsııany qýǵyn-súrginge ushyratyp, demokratııalyq qundylyqtardan shegingeni úshin qatań synǵa aldy, dep habarlaıdy BBC.

4 qarashada Eýrokomıssııa EO-ǵa múshe bolýǵa ótinish bergen 10 el: Albanııa, Bosnııa jáne Gertsegovına, Kosovo, Soltústik Makedonııa, Chernogorııa, Serbııa, Túrkııa, Moldova jáne Ýkraınadaǵy saıası oqıǵalar týraly esepterdi jarııalady.

Eýrokomıssııa bul elderdiń kóbine oń baǵa berip otyr. 

Grýzııa sholýda Brıýssel bıligi tarapynan qatań synǵa ushyraǵan jalǵyz kandıdat el boldy. 

- Esep berý kezeńinde Grýzııadaǵy demokratııanyń jaǵdaıy aıtarlyqtaı keri ketýmen sıpattaldy. Grýzııa bıligi azamattyq qoǵam, BAQ ókilderine jáne oppozıtsııa jetekshilerine qarsy jazalaý sharalaryn qoldandy, bul demokratııalyq protsesterge eleýli túrde nuqsan keltirdi jáne azamattyq qoǵamnyń qatysýyn jáne tejeý nemese tepe-teńdik júıesin is júzinde joıdy, - delingen baıandamada.

Tbılısı men Brıýssel arasyndaǵy qarym-qatynas 2024 jyldyń qazan aıynda Grýzııada ótken parlament saılaýynan keıin aıtarlyqtaı nasharlady, onda mıllıarder jáne burynǵy premer-mınıstr Bıdzına Ivanıshvılıdiń bıliktegi «Grýzın armany» partııasy jeńiske jetti.

Saılaýdan keıin, jańa úkimet quramy bekitilip, birden bıliktegi «Grýzın armany» partııasy EO-men kelissózdi 2028 jylǵa deıin keıinge qaldyratynyn málimdedi.

Ótken jyly Grýzııada «Otbasylyq qundylyqtar men kámeletke tolmaǵandardy qorǵaý týraly» zań qabyldandy, sondaı-aq basqa da 18 qoldanystaǵy zańǵa túzetýler engizildi. Otbasylyq qundylyqtar men kámeletke tolmaǵandardy qorǵaý jeleýimen Grýzııa bıligi kvır-adamdarǵa, sonyń ishinde bala asyrap alýǵa jáne tirkelgen qarym-qatynasqa shekteýler engizdi.

Transgenderlik aýysýdy jeńildetetin hırýrgııalyq protsedýralar men basqa da medıtsınalyq protsedýralarǵa tyıym salyndy.

Baıandama Grýzııa bıligi tarapynan teris reaktsııa jáne ishki saıasatqa aralasý týraly aıyptaýlar týdyrdy. 

- Biz EO músheligi máselesin saıası qural retinde paıdalanýdyń kez kelgen áreketin aıyptaımyz, bul Grýzııa men EO arasyndaǵy qarym-qatynasqa zııan keltiredi, - dep málimdedi eldiń SІM.

Grýzııanyń syrtqy ister mınıstri Maka Bochorıshvılı esep jarııalanǵanǵa deıin de onyń Grýzııaǵa qatysty oń kózqarasta bolýy ekitalaı ekenin aıtqan. Bul rette Bochorıshvılı Eýrokomıssııa eldegi oqıǵalardy jetkilikti túrde kórsetpeıdi dep sanaıdy. 

- Sońǵy kezde biz Eýropalyq Odaqtyń Grýzııaǵa bergen baǵalarynda obektıvtiliktiń tómendegenin baıqadyq. Olardyń baǵalary kóbine birjaqty. Bul eseptiń Grýzııaǵa oń áser etýi jáne Grýzııanyń qol jetkizgen aıtarlyqtaı jetistikterin kórsetýi ekitalaı, - dep málimdedi mınıstr tilshilermen áńgimesinde. 

Buǵan deıin Eýropalyq odaqtyń syrtqy ister jáne qaýipsizdik saıasaty jónindegi joǵarǵy ókili Kaıa Kallas seısenbi kúni 2030 jylǵa deıin EO-ǵa jańa memleketterdi qabyldaý «realıstik maqsat» ekenin málimdedi. 

Kallas atap ótkendeı, EO quramyna enýge ótinish bergen elderdiń baǵalaý nátıjeleri Chernogorııa, Albanııa, Ýkraına jáne Moldova úshin «negizinen oń» bolǵan. Al Serbııa, Bosnııa jáne Gertsegovına, Kosovo, Túrkııa men Soltústik Makedonııanyń múmkindikteri áli de belgisiz.

Al Grýzııanyń jaǵdaıy — kóńil kónshitpeıdi.