EO Grýzııa dıplomattary men sheneýnikteri úshin vızasyz rejımdi toqtatty

ASTANA. KAZINFORM – Vızasyz rejım belgisiz merzimge joıyldy, bul grýzındik ókiletti tulǵalardy Eýroodaq aýmaǵyna kirý úshin vıza suraýdy mindetteıdi, dep habarlaıdy Kazinform menshikti tilshisi.

Sheshim EO elderiniń aýmaǵynda nemese halyqaralyq uıymdarda resmı kezdesýler men basqa da is-sharalarǵa qatysatyn Grýzııa delegatsııalarynyń múshelerine qatysty. Buǵan qosa, bul Grýzııanyń ulttyq jáne aımaqtyq úkimetteri men parlamentteriniń, Grýzııanyń Konstıtýtsııalyq jáne Joǵarǵy sottarynyń múshelerine jáne dıplomatııalyq tólqujat ıelerine qatysty.

- Bastama qarapaıym grýzın tólqujattarynyń ıelerine áser etpeıdi. Olar úshin qysqa merzimdi saparlar úshin EO-ǵa vızasyz kirý quqyǵy saqtalady, delingen málimdemede.

Aqparatqa qatysty tilshilerge túsinik bergen Grýzııa premer-mınıstri Iraklıı Kobahıdze bul sheshimniń mańyzdy máni joq ekenin málimdedi.

- Men Eýropalyq Odaqtyń bul sheshiminen erekshe eshteńe kórip turǵan joqpyn. Bul jaı ǵana tehnıkalyq másele. Biz úshin eń bastysy, elimizde turaqtylyq pen tynyshtyqqa qaýip tónbeýi. Biz Eýroodaq elderine vızamen de, vızasyz da bara alamyz, onyń aıtarlyqtaı aıyrmashylyǵy joq, - dedi Grýzııa premeri.

Bul sheshim Grýzııanyń 2024 jyly «Sheteldik yqpaldyń ashyqtyǵy týraly» zańyn («Sheteldik agentter» týraly zań) jáne «otbasy qundylyqtary jáne kámeletke tolmaǵandardy qorǵaý» («LGBT nasıhatyna» qarsy zań) týraly zańnamalyq paketti qabyldaýyna jaýaby boldy.

EO sanaýynsha, bul zańnamalyq aktiler grýzın halqynyń negizgi quqyqtaryna, sonyń ishinde birigý jáne sóz bostandyǵyn, jeke ómirge qol suǵylmaýshylyq quqyǵyn, memlekettik isterge qatysý quqyǵyn jáne kemsitýshilikti kúsheıtedi.

EO men Grýzııa arasyndaǵy vızalardy jeńildetý týraly kelisim 2011 jyldyń 1 naýryzynda kúshine endi. Ol Grýzııa azamattaryna EO-da kez kelgen 180 kúndik merzimde 90 kúnnen aspaıtyn bolý úshin vıza berýdi jeńildetýdi kózdedi. Al 2017 jyldyń naýryz aıynda Keńes pen Eýroparlament Grýzııa azamattaryn EO-ǵa barǵan kezde vıza alý talabynan tolyǵymen bosatatyn qarar qabyldady.

Eske sala ketsek, jeltoqsanda AQSh Memlekettik departamenti Grýzııamen strategııalyq seriktestikti toqtatqanyn málimdedi.