EO Google kompanııasyna 2,95 mlrd eýro aıyppul saldy

ASTANA. KAZINFORM — 5 qyrkúıekte Eýropalyq komıssııa Google kompanııasyn jarnama almasý quraly AdX arqyly naryqtaǵy ústemdigin teris paıdalanǵany úshin 2,95 mlrd eýro aıyppul tóleýge mindettedi. Bul týraly Euronews habarlady.

Eýrokomıssııanyń málimetinshe, Google baspagerlerge arnalǵan jarnama serverin jáne jarnamany satyp alý quraldaryn paıdalaný arqyly naryqtaǵy básekelestikti shektegen.

— Endi Google múddeler qaqtyǵysyn joıý úshin mańyzdy sharalar usynýy tıis. Eger kompanııa muny jasamasa, biz qatań sharalardy qoldanamyz. Tsıfrlyq naryqtar adamdarǵa qyzmet etýge arnalǵan jáne senim men ádildik qaǵıdatyna negizdelýi tıis, — delingen básekelestik máseleleri jónindegi eýrokomıssar Teresa Rıberanyń málimdemesinde.

Google-ǵa básekelestikke qarsy dep tanylǵan tájirıbeni toqtatýǵa 60 kún ýaqyt berildi.

Aıta keteıik, Eýropalyq komıssııa Google-ǵa qatysty onlaın-jarnama tehnologııalary sektoryndaǵy resmı tergeýdi 2021 jylǵy maýsymda bastaǵan.

Kompanııa vıtse-prezıdenti Lı-Enn Malholland aıyppuldy «negizsiz» dep atap, talap etilgen ózgerister «myńdaǵan eýropalyq kásiporyndarǵa zııanyn tıgizip, olardyń tabys tabýyn qıyndatatynyn» aıtty.

Google juma kúni Eýrokomıssııa sheshimine shaǵym túsiretinin málimdedi.

Euronews atap ótkendeı, sheshim AQSh pen EO arasyndaǵy shıelenis aıasynda qabyldandy. Buǵan deıin AQSh prezıdenti Donald Tramp eýropalyq tarapty amerıkalyq IT-kompanııalardy qýdalasa, kedendik baj engizýmen qaıtadan ses kórsetken bolatyn.

Jaqynda Frantsııa da Google men Shein kompanııalaryna rekordtyq kólemde aıyppul saldy.