EO Google-ǵa 890 mln eýro aıyppul saldy
ASTANA. KAZINFORM – Eýropalyq komıssııa Google kompanııasyna Tsıfrlyq naryqtar týraly aktiniń (DMA) talaptaryn buzǵany úshin 890 mln eýro kóleminde aıyppul saldy. Osylaısha, 2024 jylǵy naýryzda bastalǵan tergeý aıaqtaldy, dep habarlaıdy Euronews.
Retteýshiniń málimetinshe, Google izdeý nátıjelerinde Google Shopping, Google Hotels jáne Google Flights sııaqty óz servısterine basymdyq berip, básekeles qyzmetterdiń kórinýin shektegen. Sonymen qatar kompanııa qosymsha ázirleýshilerdiń paıdalanýshylarǵa qoldanbalar dúkeninen tys balama tólem tásilderi men tıimdi usynystar týraly aqparat berýine kedergi keltirgen.
Eýrokomıssııa Google-dy 60 kún ishinde anyqtalǵan zańbuzýshylyqtardy joıýǵa mindettedi. Eger talap oryndalmasa, kompanııaǵa álemdik jyldyq aınalymynyń 5%-yna deıin qosymsha aıyppul salynýy múmkin.
Google bul sheshimmen kelispeıtinin málimdedi. Kompanııanyń jahandyq máseleler jónindegi prezıdenti Kent Ýoker Eýroodaq talap etip otyrǵan ózgerister servısterdiń sapasyn tómendetip, eýropalyq paıdalanýshylar men bızneske keri áser etetinin aıtty. Onyń aıtýynsha, kompanııa ózgeristerdi synaqtan ótkize bastaǵanymen, aıyppulǵa shaǵymdanatynyn ázirge habarlaǵan joq.
Brıýsseldiń bul sheshimi Eýroodaq pen AQSh arasyndaǵy shıelenisti kúsheıtýi múmkin. Donald Tramp ákimshiligi buǵan deıin Eýropanyń amerıkalyq tehnologııalyq kompanııalardy retteý saıasatyn synǵa alyp, qoldanystaǵy saýda rejıminiń merzimi aıaqtalǵannan keıin jańa saýda bajdaryn engizýge daıyndalyp jatqanyn málimdegen.
Buǵan deıin Eýropalyq odaq soty Google-ǵa salynǵan 4,1 mlrd eýro kólemindegi aıyppuldy kúshinde qaldyrǵany habarlanǵan edi. Sot kompanııa Android operatsııalyq júıesiniń keń taralǵanyn paıdalanyp, básekelesterdiń qyzmetin shektedi degen qorytyndyǵa kelgen.
