EO Google-diń ústemdigin shekteý úshin izdeý júıesindegi derekterdi bólisýdi talap etedi
ASTANA. KAZINFORM — Eýropalyq komıssııa Google kompanııasyna izdeý júıesine qatysty derekterdi úshinshi taraptarǵa berýdi usyndy. Komıssııa málimetinshe, bul sharalar Eýropalyq odaqtyń Digital Markets Act (DMA) talaptaryna sáıkestikti qamtamasyz etýge baǵyttalǵan, dep jazdy Anadoly agenttigi.
Usynysqa sáıkes, Google izdeý qyzmetimen aınalysatyn úshinshi taraptarǵa izdeý nátıjeleriniń reıtıngi, paıdalanýshylardyń suraýlary, basý (click) jáne qaralym derekterin ádil, negizdi jáne kemsitýsiz sharttarmen usynýy tıis.
Bul bastama úshinshi tarap izdeý júıeleri men izdeý fýnktsııasy bar jasandy ıntellektke negizdelgen chat-bottarǵa óz qyzmetterin jetildirýge jáne naryqtaǵy Google Search ústemdigimen básekelesýge múmkindik berýge baǵyttalǵan.
Sonymen qatar, Google izdeý derekterin jınaý kólemin, qoldanylatyn quraldardy jáne jıiligin, jeke derekterdi anonımdeý sharalaryn, derekterge qol jetkizý tártibin jáne baǵa belgileý parametrlerin ashýy qajet.
Eýropalyq komıssııa bul usynystardyń tıimdiligin baǵalaý úshin ashyq qoǵamdyq talqylaý bastady. Qyzyǵýshylyq tanytqan taraptar óz pikirlerin 1 mamyrǵa deıin bildire alady.
Komıssııa túpkilikti sheshimdi alynǵan pikirler men Google ustanymyn eskere otyryp qabyldaıdy. Qorytyndy sheshim 27 shildege deıin jarııalanatyny aıtyldy.
EO-nyń tsıfrlyq naryqtar týraly zańy aıasynda iri tehnologııalyq platformalarǵa qatań talaptar qoıylady. Erejeler buzylǵan jaǵdaıda kompanııalarǵa olardyń jahandyq aınalymynyń 10%-yna deıin aıyppul salynýy múmkin.
Aıta keteıik, 2017 jyldan beri Eýropalyq komıssııa básekelestik talaptaryn buzǵany úshin Google-ǵa jalpy somasy 9,7 mlrd eýrodan asatyn aıyppul salǵan.
Buǵan deıin Google jańa JI fýnktsııasyn iske qosqanyn jazdyq.
