EO Gaza sektoryna gýmanıtarlyq kómek jetkizý úshin dáliz ben úzilis jasaýǵa shaqyrdy
Brıýsseldegi sammıtte bes saǵattan asa kelissóz júrip, gýmanıtarlyq júkterdi qaýipsiz ári kedergisiz jetkizýge shaqyratyn ortaq málimdeme jasaý týraly sheshim qabyldandy.
7 qazanda HAMAS Izraılge shabýyl jasap, 1400 adamdy óltirip, 224 turǵyndy tutqynǵa alǵannan keıin Izraıl Gaza sektoryn bombalaýdy bastap, jylý berýdi toqtatyp, azyq-túlik pen basqa da ónimderdi kirgizbeı qoıdy.
HAMAS basqaratyn Gaza sektorynyń densaýlyq saqtaý mınıstrligi sodan beri óńirde 7000-nan astam adam óltirilgenin, jergilikti densaýlyq saqtaý júıesi quryp ketý aldynda turǵanyn málimdedi. Aýrýhanalardyń úshten bir bóligi jumys istemeıdi, basqalary tek jedel medıtsınalyq kómek qajet naýqastardy ǵana qabyldaıdy.
Keıingi kúnderi Gazaǵa tek az kólemde kómek túse bastady.
EO kóshbasshylarynyń sammıti HAMAS shabýylyn synǵa alyp, «halyqaralyq quqyqqa sáıkes Izraıl ózin qorǵaı alatynyn atap ótti».
«Eýropalyq keńes Gaza sektoryndaǵy gýmanıtarlyq jaǵdaı nasharlap ketkenine alańdap, muqtaj adamdarǵa gýmanıtarlyq dáliz ben gýmanıtarlyq qajettilikti jetkizý úshin úzilis sekildi sharalardy uıymdastyrýǵa shaqyrady», - delingen sammıt málimdemesinde.
«Gýmanıtarlyq úzilis» degenimiz – EO «beıbit turǵyndardy qorǵap, kómek kórsetip, tamaq, sý, medıtsınalyq kómek, otyn men turǵyn úıge qol jetkizýdi jeńildetip, kómektesý úshin óńirdegi seriktestermen kelisimge kelý» maqsatynda birneshe saǵat soǵysty toqtata turý», - delingen málimdemede.
Bul kózqarasty Izraıldi jaqtaıtyn Majarstan, Aýstrııa, Chehııa men Germanııa syndy Eýropa elderi de qoldady.
Irlandııa men Ispanııa kóshbasshylary kelissóz bastalar aldynda jýrnalıstermen tildesip, soǵysty toqtatýǵa shaqyrdy.
Eýropalyq Odaq jaqyn arada halyqaralyq beıbit konferentsııa ótkizýdi qoldaǵanyn atap ótken jón.
EO áskerı derjava emes. Onyń qolynan keletini – dıplomatııalyq qysym kórsetip, kómek jetkizý.
Sammıtte qabyldanǵan málimdeme eshteńeni ózgerte almaýy da múmkin. Sebebi, buǵan deıin Izraıl áskerı keńsesiniń múshesi Benı Gants Gaza sektoryndaǵy áskerı josparyna qatysty sheshimderdi óz múddesine qaraı qabyldaıtynyn málim etken bolatyn.