EO-ǵa múshe tórt memlekettiń basshysy Gazada atysty toqtatýǵa shaqyrdy
Ispanııa premer-mınıstri Pedro Sanches, Belgııa premer-mınıstri Aleksandr De Kroo, Irlandııa premer-mınıstri Leo Varadkar jáne Malta úkimet basshysy Robert Abela Eýropalyq keńes basshysy Sharl Mıshelge Eýroodaqtyń aldaǵy sammıtinde Gazadaǵy jaǵdaıdy qarastyrýdy jáne ondaǵy uzaq gýmanıtarlyq atysty toqtatýǵa birlesip shaqyrýdy surap hat joldady, dep habarlaıdy Kazinform agenttiginiń tilshisi.
Eýropalyq Odaq memleket jáne úkimet basshylarynyń sammıtin 14-15 jeltoqsanda Brıýssel qalasynda ótkizý josparlanǵan. Eýroodaqtyń 27 memleketiniń basshylary onda Eýropalyq Odaqtyń ishki jáne syrtqy saıasatynyń ózekti máselelerin talqylaýǵa nıetti.
EO-ǵa múshe tórt eldiń úkimet basshylarynyń hatyna 2024 jyldyń 1 qańtarynan bastap Eýropalyq Keńeske Belgııa qabyldanatyn Ispanııa tóraǵalyǵynyń sońǵy kezeńinde qol qoıyldy.
Ispanııa, Belgııa, Irlandııa jáne Malta kóshbasshylarynyń pikirinshe, halyqaralyq qaýymdastyqtyń shuǵyl sharalar qabyldaýy jáne Eýropalyq keńeste jaǵdaıdy baıypty talqylaýy óte mańyzdy. Aldaǵy pikirtalasta olar barlyq 27 memleket Izraıl men HAMAS arasyndaǵy qaqtyǵys pen onyń gýmanıtarlyq saldary týraly naqty jáne berik pozıtsııa ustanýyn suraıdy.
Eýroodaqtyń tórt memleketi HAMAS uıymynyń 7 qazandaǵy lańkestik áreketin aıyptap, Izraıldiń halyqaralyq quqyq boıynsha qorǵanys quqyǵyn moıyndaıdy, sondaı-aq kepilge alynǵandardy ishinara bosatýǵa jáne gýmanıtarlyq kómekti arttyrýǵa múmkindik bergen gýmanıtarlyq úziliske qanaǵattanatyndyqtaryn bildirdi.
Biraq Ispanııa, Belgııa, Irlandııa jáne Malta ókilderiniń atap ótýinshe, EO budan ári qaraı soǵys qımyldaryn toqtatýdy, Gaza sektoryndaǵy beıbit turǵyndardyń qorǵalýyn jáne palestınalyqtarǵa gýmanıtarlyq kómektiń kedergisiz jetýin talap etip, muny ádeıi boldyrmaý halyqaralyq quqyqqa qaıshy bolýy múmkin ekenin eskertýi tıis.
