EO energııa óndirý kólemin arttyrý múmkindikterin qarastyryp jatyr
ASTANA. KAZINFORM — Búgin Brıýsselde Eýropalyq odaqqa múshe 27 eldiń memleket jáne úkimet basshylarynyń kezekti sammıti ótip jatyr. Іs-sharany ashqan Antonıý Koshta EO-nyń negizgi damý baǵyttaryn atap ótti, dep habarlaıdy Brıýsseldegi Kazinform agenttiginiń menshikti tilshisi.
A. Koshta 2026 jyl Eýropada básekege qabilettilik jyly bolyp belgilengenin aıtty. Onyń sózinshe, sammıt barysynda kóshbasshylar eýropalyq ekonomıkanyń básekege qabilettiligin arttyrý máselesine nazar aýdarady.
Ol ekonomıkalyq ósimdi kúsheıtý, sapaly jumys oryndaryn qurý jáne strategııalyq derbestikti arttyrýdyń mańyzyn atap ótti. Sonymen qatar birneshe apta buryn Alden-Bızendegi kóshpeli otyrysta aıtylǵan «Bir Eýropa — bir naryq» ýádesiniń oryndalatynyn jetkizdi.
Koshta ıntegratsııany kúsheıtý qajet ekenin, atap aıtqanda energetıka men telekommýnıkatsııa sektorlaryn biryńǵaı naryqqa biriktirý kerektigin aıtty. Sondaı-aq jeńildetý baǵdarlamalaryn jalǵastyrý jáne jasandy ıntellekt, kvanttyq esepteýler sııaqty jańa salalarǵa ınvestıtsııa salýdy usyndy. Budan bólek, qaıta daıarlaý men úzdiksiz bilim berý júıesin damytý mańyzdy ekenin atap ótti.
Onyń aıtýynsha, uzaq merzimdi jańa bıýdjet qajet jáne ınvestıtsııalardy qoldaý úshin eýropalyq jınaqtardy jumyldyrý kerek. Osy maqsatta Jınaq jáne ınvestıtsııalar odaǵy týraly kelisim jasaý mańyzdy ekenin de aıtty.
Koshta qazirgi tańda energetıka salasynda kúrdeli kezeń júrip jatqanyn da jasyrmady.
— Árıne, qazirgi ýaqytta energetıka salasynda qıyn kezeńdi bastan ótkerip jatqanymyzdy eshkim joqqa shyǵara almaıdy jáne bul máselelerdi sheshýimiz qajet, — dedi ol.
Onyń aıtýynsha, Irandaǵy qazirgi qaqtyǵys energetıkalyq turaqtylyqtyń eń senimdi joly — óz energııa óndirisin arttyrý ekenin kórsetip otyr.
— Irandaǵy qazirgi qaqtyǵys energetıka salasynda boljamdy ári senimdi bolashaqty qamtamasyz etýdiń eń tıimdi joly — óz energııa óndirisin arttyrý ekenin taǵy da dáleldedi. Bul — energetıkalyq júıeniń derbestigine, táýelsizdigine jáne qaýipsizdigine aparar jalǵyz jol, — dedi Antonıý Koshta.
Ol energetıkalyq ótpeli kezeńdi júzege asyrý qajet ekenin, biraq ár eldiń erekshelikteri eskerilýi tıis ekenin atap ótti. Sonymen birge EO tek búgingi ekonomıkany qorǵap qana qoımaı, bolashaq urpaq úshin ekologııalyq turaqty orta qalyptastyrýy tıis ekenin aıtty.
— Energetıkalyq ótpeli kezeńdi júzege asyrý — bizdiń basty mindetimiz. Árıne, biz muny múshe memleketterdiń erekshelikterin jáne energııany kóp qajet etetin salalardyń jaǵdaıyn eskere otyryp oryndaýymyz kerek. Biraq biz muny birge jasaýymyz qajet jáne tek búgingi kompanııalardy qorǵap qana qoımaı, keler urpaq ómir súretin planetany da qamtamasyz etýimiz kerek. Bul klımattyq jáne ekologııalyq maqsattardyń bir bóligi, — dedi ol.
Sózin qorytyndylaı kele, Antonıý Koshta energııanyń qaýipsizdikpen tikeleı baılanysty ekenin atap ótti.
— Energııa — bul qaýipsizdik. Sondyqtan óz energııamyzdy óndirý qýatyn arttyrýymyz qajet, óıtkeni bul — qaýipsizdikke aparatyn jalǵyz jol, — dep túıindedi ol.
Aıta ketelik Eýropalyq odaq Qazaqstan munaıynyń eksportyna kedergi keltirmeıtini týraly jazǵan edik.