EO elderiniń ishinde qaı memleket aǵylshyn tilin eń jaqsy meńgergen
ASTANA. KAZINFORM — EF English Proficiency Index zertteýi Eýroodaq turǵyndarynyń aǵylshyn tilin oqýda tyńdalym men oqylym daǵdylaryn jaqsy meńgergenin, al aýyzsha jáne jazba til daǵdylary salystyrmaly túrde tómen ekenin kórsetti. Bul týraly Euronews jazdy.
Zertteý boıynsha, Nıderland azamattary jetinshi jyl qatarynan aǵylshyn tilin eń joǵary deńgeıde meńgergen halyq retinde tanyldy.
EF English Proficiency Index málimetinshe, Nıderland 2024 jylmen salystyrǵanda 12 pýnktke tómendegenine qaramastan, álem boıynsha aǵylshyn tilin shet tili retinde eń jaqsy meńgergen el ataǵyn qaıta ıelendi. Odan keıingi oryndardy Horvatııa men Avstrııa alyp otyr. Bul elderde 2024 jylmen salystyrǵanda kórsetkish tıisinshe 10 jáne 16 pýnktke ósken.
Aǵylshyn tilin óte joǵary deńgeıde meńgergen elder qataryna EO-nyń 12 memleketi kiredi. Bul deńgeı kúrdeli mátinderdi túsiný, áleýmettik jaǵdaılarǵa sáıkes tildik formalardy qoldaný jáne aǵylshyn tilin erkin biletin tulǵamen kelissóz júrgize alý sııaqty daǵdylardy qamtıdy.
Al Italııa, Kıpr jáne Frantsııa EO boıynsha aǵylshyn tilin eń tómen deńgeıde meńgergen memleketter sanalady. Olar «orta deńgeı» sanatyna kirip, kásibı kezdesýlerge qatysý, tanys taqyryptarǵa iskerlik hat jaza alý jáne án mátinderin túsiný sııaqty daǵdylarymen sıpattalady. Bul topta Lıtva men Ispanııa da bar.
EF English Proficiency Index 2025 nátıjesi 123 el men óńirdiń 2,2 mln eresek turǵynynyń testileý derekterine negizdelgen.
Eýrostatıstıkanyń sońǵy málimetine sáıkes, 2023 jyly aǵylshyn tili EO-daǵy mektepter men kásibı bilim berý júıesinde eń kóp oqytylatyn shetel tili boldy: jalpy orta bilimniń joǵary satysynda oqýshylardyń 96%, al kásibı bilimde 80,1% aǵylshyn tilin meńgergen.
Degenmen, EO boıynsha oqytý sapasynda birqatar alshaqtyqtar bar. Elderdiń basym bóliginde oqylym men tyńdalym jaqsy damyǵanymen, aýyzsha sóıleý jáne jazý daǵdylary tómendeý ekeni anyqtalǵan.
Zertteýde genderlik aıyrmashylyq ta baıqaldy: 2014-2025 jyldar aralyǵynda Eýropada aǵylshyn tilin meńgerý deńgeıi erler arasynda 40 pýnktke, áıelder arasynda 20 pýnktke artqan.
Jastar arasyndaǵy til meńgerý deńgeıi pandemııaǵa deıingi kórsetkishten áli de tómen. 2025 jyly da kóptegen elderde jas býynnyń aǵylshyn tili deńgeıi tómendeý úrdisi saqtalǵan. Sońǵy on jylda aǵylshyn tilin meńgerý kórsetkishi tek 18-20 jas aralyǵyndaǵy eýropalyqtarda tómendegen.
Sarapshylar aǵylshyn tiline suranys joǵary bolyp otyrǵanyn, shamamen 2 mlrd adam tildi túrli ádispen meńgeretinin aıtady.
EF sarapshysy Krıstofer Makkormıktiń aıtýynsha, jasandy ıntellekt til úıretý salasynda úlken ózgeristerge sebep bolyp otyr. AI emtıhan tapsyrmalaryn avtomatty túrde baǵalaý, sabaq josparyn qurastyrý jáne oqý materıaldaryn jańartý múmkindikterin keńeıtetinin atap ótti. Degenmen, mamandar algorıtmderdi qoldanýda jaýapkershilik, naqty reglamentter jáne táýekelderdi túsiný mańyzdy ekenin eskertedi.
Aıta keteıik, bıylǵy naýryzda Tramp aǵylshyn tilin Amerıka Qurama Shtattarynyń resmı tili dep jarııalady.