EO elderi Makronnyń «ıadrolyq qolshatyr» týraly usynysyn kútip otyr

ASTANA. KAZINFORM – Eýropalyq odaq elderi Frantsııa prezıdenti Emmanıýel Makronnyń jańartylǵan ıadrolyq tejeý doktrınasyna qatysty baǵdarlamalyq málimdemesin kútýde, dep habarlaıdy Euronews.

Makronnyń sózi 2 naýryzǵa josparlanǵan. Frantsııa jańa ıadrolyq strategııasyn jarııalaýǵa daıyndalyp jatyr. Onda EO-ǵa múshe kórshiles memleketterdi Frantsııanyń ıadrolyq qorǵanysy aıasynda qorǵaý stsenarııi qarastyrylýy múmkin.

Politico basylymynyń jazýynsha, Germanııa men Shvetsııa sekildi birqatar el Parıjben ıadrolyq tejeý máselesi boıynsha kelissózder júrgizip jatqanyn rastaǵan.

Ótken jyldyń kókteminde Makron AQSh-pen qarym-qatynastyń ózgerýi jáne óńirlik turaqsyzdyq jaǵdaıynda Frantsııa EO elderin óziniń «ıadrolyq qolshatyryna» alý múmkindigin joqqa shyǵarmaǵan edi. Qazirgi tańda Eýroodaq ishinde ıadrolyq qarýy bar jalǵyz memleket – Frantsııa. Ulybrıtanııa da ıadrolyq derjava bolǵanymen, EO quramyna kirmeıdi.

Frantsýz halyqaralyq qatynastar ınstıtýtynyń ıadrolyq tejeý jónindegi sarapshysy Eloız Faıeniń aıtýynsha, mundaı stsenarıı shynaıy bolýy múmkin.

– Eger bir kúni AQSh-tyń qaýipsizdik kepildikterine senim joǵalsa jáne Eýropadan ıadrolyq ári dástúrli kúshter shyǵarylsa, onda Frantsııa men Ulybrıtanııa belsendi qımyldaýǵa, tipti oqtumsyqtar sanyn arttyrýǵa májbúr bolýy yqtımal, – dedi ol Euronews-ke bergen suhbatynda.

2020 jyly Makron Frantsııanyń «300-den az» ıadrolyq oqtumsyǵy bar ekenin málimdegen. Onyń aıtýynsha, bul eldiń ómirlik mańyzdy múddelerine qaýip tóndirgen kez kelgen qarsylasqa «qabyldaýǵa bolmaıtyn zalal» keltirýge jetkilikti.

Eloız Faıe Makron buǵan deıin odaqtastarmen Eýropadaǵy frantsýz ıadrolyq qarýynyń róli týraly strategııalyq dıalog bastaýǵa shaqyrǵanyn eske saldy. Onyń pikirinshe, aldaǵy sózinde Frantsııa basshysy osy baǵyttaǵy naqty bastamalar men usynystardy jarııa etýi múmkin.

Sonymen qatar AQSh-tyń EO-daǵy turaqty ókili Endrıý Pazder Bloomberg agenttigine bergen suhbatynda Vashıngton Eýropany «ıadrolyq qolshatyrsyz» qaldyrýdy josparlap otyrmaǵanyn aıtty.

Al Reseı tarapy buǵan deıin Makronnyń bastamalarynan «ıadrolyq bopsalaýdyń belgilerin» kóretinin jáne Frantsııanyń «Eýropanyń ıadrolyq qamqorshysyna» aınalýǵa umtylyp otyrǵanyn málimdegen bolatyn.

Aıta keteıik, buǵan deıin Eýrokomıssııa tóraǵasy Ýrsýla fon der Lıaıen Parıjde Emmanýel Makronmen kezdesetini habarlanǵan bolatyn.