EO elderi qorǵanys úshin 127 mıllıard eýro nesıe surady
ASTANA. KAZINFORM – Eýropalyq Odaqtyń 18 eli «Eýropa qaýipsizdigine arnalǵan is-qımyl» (SAFE — Security Action for Europe) atty birlesken qorǵanys ınvestıtsııasy baǵdarlamasy aıasynda jalpy somasy keminde 127 mıllıard eýro bolatyn qorǵanys jobalaryna nesıe surady. Bul týraly DW agenttigi habarlady.
Eýrokomıssııanyń málimetinshe, bul qyzyǵýshylyq olarǵa «naryqtan qarajat tartýǵa daıyndalýǵa jáne suranysty baǵalaýǵa» múmkindik beredi.
— SAFE baǵdarlamasyna kórsetilgen úlken qyzyǵýshylyq, ıaǵnı keminde 127 mıllıard eýro kólemindegi áleýetti qorǵanys satyp alýlary, Eýroodaqtyń qaýipsizdik pen qorǵanys salasyndaǵy birligin jáne ortaq umtylysyn kórsetedi. Biz EO elderiniń eýropalyq qaýipsizdikti nyǵaıtýǵa baǵyttalǵan kúsh-jigerin qoldaýǵa daıynbyz, — dedi EO-nyń qorǵanys jónindegi komıssary Andrıýs Kýbılıýs.
SAFE baǵdarlamasy boıynsha nesıe alýǵa Belgııa, Bolgarııa, Chehııa, Estonııa, Gretsııa, Ispanııa, Frantsııa, Horvatııa, Italııa, Kıpr, Latvııa, Lıtva, Vengrııa, Polsha, Portýgalııa, Rýmynııa, Slovakııa jáne Fınlıandııa qyzyǵýshylyq bildirdi.
SAFE sheńberinde resmı ótinim berýdiń sońǵy merzimi — 2025 jyldyń 30 qarashasy.
Buǵan deıin, 27 mamyrda jarııalanǵan Eýroodaq Keńesiniń málimdemesine sáıkes, EO 150 mıllıard eýro kólemindegi SAFE qorǵanys qoryn qurýdy maquldaǵan bolatyn.
— Bul qordyń maqsaty — óndiristik qýattardy arttyrý, qajet bolǵan jaǵdaıda qorǵanys jabdyqtarynyń bolýyn qamtamasyz etý jáne qazirgi áleýettegi olqylyqtardy joıý. Bul túptep kelgende Eýroodaqtyń jalpy qorǵanys qabiletin nyǵaıtady, — delingen málimdemede.
Josparǵa sáıkes, qor qarajattary múshe memleketterge uzaq merzimdi, básekege qabiletti paıyzdyq mólsherlememen beriletin nesıeler túrinde bólinedi. Alaıda nesıe alýshylar keminde eki basqa elmen birigip birlesken satyp alýlar júrgizýi tıis.
Aıta keteıik, SAFE baǵdarlamasyn Eýrokomıssııa naýryz aıynyń sońynda usynǵan. Uzaq merzimdi maqsat — EO elderiniń qarýlanýyna kómektesý úshin 800 mıllıard eýroǵa deıingi qarajatty jumyldyrý. Bul Eýropanyń qorǵanys salasynda AQSh-qa táýeldiligin azaıtý nıetimen baılanysty.
Buǵan deıin keıbir EO elderi Ýkraınaǵa arnalǵan AQSh-tan qarý satyp alýdan bas tartqany habarlanǵan bolatyn.