EO elderi BUU áskerin Lıvannyń ońtústiginen shyǵarmaıdy - Aýstrııa SІM
ASTANA.KAZINFORM – Lıvandaǵy BUU bitimgershilik kúshine (UNIFIL) úles qosyp jatqan Eýropalyq Odaq elderi Izraıldiń shaqyrýlaryna qaramastan, eldiń ońtústiginen áskerlerin shyǵarýǵa nıeti joq. Bul týraly Aýstrııa Syrtqy ister mınıstri Aleksandr Shallenberg málimdedi.
Jeksenbi kúni premer-mınıstr Bınıamın Netanıahý BUU-ny Lıvandaǵy BUU ýaqytsha kúshterin (UNIFIL) «Hezbolla» bekinisteri men urys aımaqtarynan shyǵarýǵa shaqyrdy.
Alaıda dúısenbi kúni Eýroodaq syrtqy ister mınıstrleriniń pikirtalastaryn qorytyndylaǵan Aýstrııa Syrtqy ister mınıstri Shallenberg Eýropa elderiniń áskerlerin shyǵarý nemese qaıtarý nıeti joq ekenin aıtty.
- Sheginý týraly eshqandaı pikirtalas bolǵan joq. Olar sonda qalady, biraq bizdiń áskerlerdiń qaýipsizdigi men tutastyǵy mańyzdy jáne barlyǵymen qamtamasyz etilýi kerek, - dedi mınıstr Brıýsselde Reuters agenttigine bergen suhbatynda.
Izraıldiń «Hezbollaǵa» qarsy jerústi operatsııasy 1 qazanda bastalǵannan beri BUU bitimgerlishilik kúshi pozıtsııalary atqylaýǵa ushyrady jáne Izraıldiń eki tankisi bazalardyń birine basyp kirdi, dep habarlady BUU. Bes bitimger jaraqat aldy.
EO-nyń on alty eli, sonyń ishinde Aýstrııa BUU-ynyń bitimgershilik kúshine óz úlesin qosty jáne sońǵy oqıǵalar eýropalyq úkimetter arasynda keń alańdaýshylyq týdyrdy. Mıssııanyń jalpy sany 10 myńdaı bolsa, onyń 3,6 myńǵa jýyǵyn Eýropa elderi jibergen. Aýstrııa BUU-ynyń bitimgershilik kúshine 160-qa jýyq jaýynger jiberdi.
Eýropalyq sheneýnikterdiń aıtýynsha, EO-ǵa qatysýshy elder búgin ásker sany, jabdyqtalýy jáne erejelerindegi mıssııanyń qazirgi jaǵdaıy men uzaq merzimdi róline arnalǵan beınekonferentsııa ótkizýdi josparlap otyr.
