EO ekonomıkasyna tereń retsessııa qaýpi tónip tur - Eýrokomıssııa

BRıÝSSELЬ. QazAqparat – Eýropalyq odaq jáne ulttyq deńgeıdegi jyldam ári aýqymdy jaýap sharalaryna qaramastan, koronavırýs pandemııasyna baılanysty bıyl EO ekonomıkasyna tereń retsessııa qaýpi tónip tur. Mundaı tujyrymdar seısenbi kúni jarııalanǵan Eýrokomıssııanyń 2020 jyldyń jazyna arnalǵan ekonomıkalyq boljamynda keltirilgen, dep habarlaıdy QazAqparat menshikti tilshisi.

Koronavırýsqa baılanysty shekteýlerdi alyp tastaý baıaý qarqynmen júrip jatqandyqtan, bıylǵy jyly pandemııanyń ekonomıkalyq belsendilikke áseri buǵan deıin boljanǵannan góri edáýir bolady.

Boljam boıynsha, eýroaımaqtyń ekonomıkasy bıyl 8,7% tómendeıdi, 2021 jyly 6,1% ósedi. Al EO ekonomıkasy 2020 jyly 8,3% tómendep, kelesi jyly 5,8% ǵana artady.

Osylaısha, 2020 jyly retsessııa eýroaımaq úshin 7,7% jáne jalpy EO úshin 7,4% qurap, boljanǵannan áldeqaıda tereń bolmaq. 2021 jylǵy ósim Eýrokomıssııanyń kóktemde kútken deńgeıinen birshama turaqty bolady.

«Pandemııa jáne koronavırýstyń taralýyn toqtatý boıynsha qabyldanǵan sharalar, negizinen, ekinshi toqsandaǵy ekonomıkalyq belsendilikke áser etti. Bul, Ekinshi dúnıejúzilik soǵystan keıingi ІJÓ tómendeýiniń alǵashqy kórinisi», – dedi seısenbide Brıýsselde ótken baspasóz konferentsııasynda ekonomıka jónindegi eýrokomıssar Paolo Djentılonı.

Ekonomıkany qalpyna keltirý protsesi osy jyldyń ekinshi jartysynda qarqyn almaq. Degenmen, ol EO-nyń ártúrli elderinde tolyq emes jáne birkelki bolmaıdy.

«Ekonomıkalyq belsendiliktiń tómendeýi sonshalyqty aýyr boldy. Ekinshi jartyjyldyqta ishinara qalpyna keltirý jyl saıynǵy ósý qarqynyn aıtarlyqtaı arttyra almaıdy», - dedi Djentılonı.

Inflıatsııa boljamy aıtarlyqtaı ózgergen joq jáne bıyl 0,3%, kelesi jyly 1,1% bolady dep kútilýde. EO úshin ınflıatsııa 2020 jyly 0,6% jáne 2021 jyly 1,3% deńgeıinde bolýy yqtımal.

Ekiudaı jaǵdaı joǵary bolyp qalyp otyr. Al ahýaldyń odan ári nasharlaý qaýpi joǵary. Óıtkeni pandemııanyń aýqymy men uzaqtyǵy belgisiz.