EO delegattary Qazaqstanmen saýda-sattyqtyń ózekti máselelerin talqylady
ALMATY. QazAqparat - Eýroodaq ókilderi arnaıy joba aıasynda Qazaqstanmen saýda-sattyq baılanysyndaǵy ózekti máselelerdi talqylady, dep habarlaıdy QazAqparat tilshisi.
2015 jyly 21 jeltoqsanda Qazaqstan men Eýroodaq arasynda ózara áriptestikti damytý týraly kelisimge qol qoıylǵan bolatyn.
2016 jyldyń 1-mamyrynan bastap kelisim ýaqytsha qoldanysqa engen edi.
Qazaqstan men EO elderi kelisimdi ratıfıkatsııalady. Qyrkúıekte bul qujatty Eýroparlament ratıfıkatsııalaıdy.
«EO elderimen saýda úlesi Qazaqstannyń syrtqy saýdasynyń 39%-yn alyp otyr. EO - 0.58 %, ıaǵnı eń tómengi eksport tarıfteri ornatylǵan jalǵyz seriktes. DSU-ǵa kirgeli beri Qazaqstan ınvestıtsııalyq saıasatyn qaıta josparlady. Ony Astanada ótken ınvestforýmda jarııa etti. Qazaqstan óziniń ekonomıkasyn munaı-gaz salasyna táýeldilikten aryltyp, ártaraptandyrýǵa tyrysyp jatyr. Biraq sonda da keıbir salalar talqylaýdy qajet etedi»,- dedi EO Qazaqstandaǵy ókildiginiń elshisi Traıan Hrıstea.
Ekijaqty kezdesý barysynda qos eldiń mamandary ózara kelisimniń tıimdiligin arttyrý maqsatynda zańdyq-quqyqtyq kelispeýshilikterdi anyqtap jatyr.
«Qazaqstan EO jáne DSU múshesi bolyp tabylady. Biraq elde ulttyq zańnama bekitilgen. Qoldanystaǵy tehreglamentte tarıftik emes kedergiler týraly aqparatqa qol jetkizý múmkin emes. Qaıbir ónimge qandaı reglament bar ekendigin anyqtaýǵa kóp ýaqyt ótedi. Qazaqstan úkimeti aqparattyń ashyqtyǵyna múddeli ekendigin kórip otyrmyz.
Osy máseleni naqtylaý úshin qandaı qadamdarǵa barý kerek ekendigin anyqtaý úshin kezdestik», - dedi EO Qazaqstandaǵy ókildiginiń saýda máselesi boıynsha bólim basshysynyń birinshi keńesshisi Federıko Bırokkı.
Mamandardyń aıtýynsha, kóbine dári-dármek, oıynshyq, azyq-túlik salasynda EO men Qazaqstan normatıvteri sáıkespeıdi.
Aıa ketý kerek, ótken jyly Qazaqstan men Eýroodaq arasyndaǵy saýda kólemi 24 mlrd AQSh dollaryn qurady. 2017 jyldyń alǵashqy 4 aıynda 9 mlrd dollar kóleminde saýda jasaldy. Bul ótken jylǵy kórsetkishten 23 paıyzǵa artyq.
