EO data-ortalyqtardyń energııa men sýdy tutynýyn shektemek
ASTANA. KAZINFORM – Eýropalyq komıssııa energııany kóp qajet etetin data-ortalyqtardyń sý men elektr energııasyn tutynýyn baqylaýǵa arnalǵan jańa ekologııalyq normalardy tanystyrdy. Al tıimdiliktiń eń tómengi standarttary 2027 jyly ǵana kúshine enedi, dep habarlaıdy Euronews.
Eýropalyq komıssııa odaq elderine ortaq data-ortalyqtardy baǵalaý júıesin jarııalady. Ol nysandardyń naqty sý men elektr energııasyn tutyný kólemin barynsha ashyq etýge múmkindik beredi. Bul qadam tsıfrlyq ındýstrııany Eýropanyń ortaq energetıkalyq ekojúıesine tıimdi kiriktirýge baǵyttalǵan.
Jańa baǵdarlama qýaty 500 kVt-tan asatyn tehnologııalyq nysandarǵa ǵana qoldanylady. Olarǵa beriletin baǵa energııa júıesine paıdaly faktorlarǵa baılanysty bolady. Olardyń qatarynda jabdyqtar bóletin jylýdy qaıta paıdalaný, taza energııanyń balama kózderin qurý jáne tutyný ıkemdiligin basqarý bar. Reuters agenttiginiń habarlaýynsha, operatorlar tutynylatyn sýdyń kólemin jergilikti klımattyq táýekeldermen jáne óńirdegi sý resýrstarynyń tapshylyǵymen salystyrýǵa da mindetteledi.
Baǵalaý júıesi Eýropalyq komıssııanyń 2035 jylǵa qaraı EO aýmaǵyndaǵy data-ortalyqtardyń jalpy qýatyn úsh ese arttyrý jospary aıasynda ázirlendi. Bul strategııa úshinshi elderdegi iri tehnologııalyq kompanııalarǵa táýeldilikti azaıtyp, jasandy ıntellekt salasyndaǵy Eýropanyń óz múmkindikterin damytýǵa baǵyttalǵan. Jaqynda Eýroparlament depýtattary Microsoft kompanııasynyń Eýropada ázirlenip jatqan jańa normalarǵa yqpal etý áreketterine alańdaýshylyq bildirdi.
Energetıkalyq daǵdarys jaǵdaıynda qoǵamnyń bir bóligi mundaı resýrsty kóp qajet etetin ortalyqtardy damytýdyń qanshalyqty oryndy ekenine kúmán keltiredi. Brıýsseldiń aıtýynsha, bultty servısterdi, jasandy ıntellekt pen tsıfrlyq qyzmetterdi qamtamasyz etý úshin Eýropalyq odaqqa data-ortalyqtar qajet. Sonymen birge Eýropalyq komıssııa olardyń qarqyndy damýy elektr jelilerine, sý resýrstaryna jáne jergilikti qaýymdastyqtarǵa túsetin júktemeni arttyryp otyrǵanyn moıyndaıdy.
Eýropalyq odaqtyń málimetinshe, 2024 jyly Eýropadaǵy data-ortalyqtar 68 teravatt-saǵat (TVt·saǵ) elektr energııasyn tutynǵan. EO baǵalaýynsha, 2030 jylǵa qaraı bul kórsetkish 114 TVt·saǵatqa deıin ósedi. Bul odaqtaǵy jalpy elektr energııasy tutynýdyń 3,2%-yn quraıdy. Qazir bul kórsetkish 2,5% deńgeıinde.
Jańa turaqtylyq belgisi nysandardy energııa tıimdiligi men sý tutyný kórsetkishteri, sondaı-aq olarǵa jetkiziletin elektr energııasynyń kózderi boıynsha salystyrýǵa múmkindik beredi. Alaıda 2023 jyldan beri qýaty 500 kVt-tan asatyn data-ortalyqtarǵa esep berý mindeti engizilgenine qaramastan, Eýropalyq komıssııa bul talaptardyń ázirge tolyq oryndalmaı otyrǵanyn moıyndady.
– Birinshi jyly (...) data-ortalyqtardyń shamamen úshten birinen esep aldyq. Ekinshi jyly jaǵdaı jaqsardy, al úshinshi jyldyń aldyn ala nátıjeleri odan da jaqsy. Meniń oıymsha, biz 50 paıyzdyq kórsetkishke qıyndyqsyz jetemiz, – dedi Eýropalyq komıssııa ókili dúısenbi kúni jýrnalısterge bergen túsiniktemesinde. Ol óz aty-jónin jarııalamaýdy suraǵan.
Sonymen qatar ol normalardyń oryndalýyn baqylaý negizinen EO-ǵa múshe memleketterdiń jaýapkershiliginde ekenin atap ótti. Onyń aıtýynsha, naqty baqylaý kelesi jyldyń basynda bastalady.
