EO-da zańsyz mıgranttardy qaıtarý sharalary qatańdaıdy
ASTANA. KAZINFORM – Eýropalyq odaqta zańsyz mıgranttardy deportatsııalaý kórsetkishi sońǵy jyldary rekordtyq deńgeıge jetti. Alaıda Eýrokomıssııa bul sharalardy áli de jetkiliksiz dep sanap otyr, dep jazdy BILD.
Eýrokomıssar Magnýs Brýnnerdiń málimetinshe, 2025 jyly EO aýmaǵynan shyǵarylýǵa tıis mıgranttardyń 28%-y deportatsııalanǵan. Bul – sońǵy onjyldyqtaǵy eń joǵary kórsetkish.
– Ótken jyly 491 myńnan astam adam EO-dan ketýi tıis boldy, olardyń shamamen 135 myńy deportatsııalandy. Bul aldyńǵy jyldarmen salystyrǵanda aıtarlyqtaı ósim, – dedi Magnýs Brýnner.
Salystyrý úshin, 2022 jyly zańsyz mıgranttardyń tek 16%-y ǵana (72 myń adam) elden shyǵarylǵan.
Eýrokomıssardyń aıtýynsha, kórsetkishtiń ósýine múshe memleketterdiń úılesimdi áreketi, aqparat almasýdyń jaqsarýy jáne keıbir qabyldaýshy elderdegi turaqtylyq áser etken. Soǵan qaramastan, ol qoldanystaǵy erejelerdiń tıimdiligi jetkiliksiz ekenin atap ótti.
– Zańsyz mıgranttardy qaıtarýdyń qazirgi júıesi tolyq jumys istemeıdi. Protsesti jedeldetý qajet, – dedi ol.
Osyǵan baılanysty EO jańa qatań sharalardy qarastyryp otyr. Olardyń qatarynda deportatsııaǵa jatatyn tulǵalarǵa mindetti talaptardy kúsheıtý, qylmys jasaǵandarǵa qatysty qatań erejeler engizý jáne memleketter arasyndaǵy yntymaqtastyqty arttyrý bar.
Sonymen qatar deportatsııa aldynda ustaý merzimin uzartý jáne mıgranttardy EO aýmaǵynan tys ornalasatyn arnaıy ortalyqtarǵa ornalastyrý múmkindigi talqylanýda.
– Úshinshi elder óz azamattaryn qabyldaýy tıis. Biz bul úshin vızalyq saıasat, saýda jáne damý kómegi sııaqty tetikterdi qoldanamyz, – dep atap ótti Magnýs Brýnner.
Aıta keteıik, Eýroodaqta zańsyz kóshi-qon máselesin retteý boıynsha jańa reformalar paketi qarastyrylyp jatyr.
