EO-da sheteldikterdiń kirip-shyǵýyn baqylaıtyn jańa júıe iske qosylady
ASTANA. KAZINFORM — Eýropalyq komıssııa kirý-shyqqandy tirkeý júıesin (Entry/Exit System, EES) iske qosý kúnin belgilep, ony 2025 jylǵy 12 qazanǵa josparlap otyr. Bul týraly AZERTADJ agenttigi habarlaıdy.
Júıeni engizý alty aı ishinde kezeń-kezeńimen júzege asyrylady jáne 2026 jylǵy 10 sáýirde tolyq aıaqtalady.
Jańa júıe 29 eldi qamtıdy: EO-ǵa múshe barlyq memleket (Kıpr men Irlandııadan basqa), sondaı-aq Islandııa, Lıhtenshteın, Norvegııa jáne Shveıtsarııa.
Júıe EO quramyna kirmeıtin elderdiń azamattary úshin qysqa merzimdi saparlar kezinde kirý jáne shyǵý derekterin avtomatty túrde tirkeýge arnalǵan.
EES pasportaǵa qolmen mór basý rásimin almastyrady.
Shekarany alǵash ret kesip ótken kezde saıahatshylardan pasport derekteri, kirý men shyǵý kúni jáne orny, sondaı-aq bıometrııalyq málimetter — saýsaq izderi men bet-álpet sýreti jınalady.
Jańa júıeniń basty maqsaty — shekaralyq baqylaýdy jedeldetý, kezekterdi azaıtý jáne qaýipsizdikti arttyrý. Sondaı-aq júıe qonaq bolý merzimin baqylaýǵa, erejebuzýshylardy anyqtaýǵa, qujattyq alaıaqtyqtyń jolyn kesýge, terrorızm men uıymdasqan qylmysqa qarsy kúreske múmkindik beredi.
Júıe tolyq engizilgenge deıin keıbir shekaralyq ótkelderde dástúrli mór basý tártibi saqtala bermek.
Budan buryn Eýroodaq Túrkııa azamattary úshin Shengen vızalaryn rásimdeýdi jeńildetkenin jazdyq.