EO-da satylatyn barlyq jańa kólik júrgizýshiniń nazaryn baqylaıtyn júıemen jabdyqtalady
ASTANA. KAZINFORM — Shilde aıynan bastap Eýropalyq odaq elderinde satylatyn barlyq jańa jeńil avtokólik júrgizýshiniń jolǵa qanshalyqty nazar aýdaryp otyrǵanyn baqylaıtyn arnaıy júıemen mindetti túrde jabdyqtalady.
Júrgizýshiniń nazaryn baqylaýǵa arnalǵan Advanced Driver Distraction Warning (ADDW) júıesi róldiń mańyna nemese aldyńǵy panelge ornatylǵan ınfraqyzyl kamera arqyly júrgizýshiniń qaıda qarap otyrǵanyn baqylaıdy.
Eger júrgizýshi joǵary jyldamdyqpen kele jatqanda joldan kózin 3,5 sekýndtan artyq, al tómen jyldamdyqpen qozǵalǵanda 6 sekýndtan artyq ýaqytqa basqa jaqqa aýdarsa, júıe dybystyq, jaryq nemese diril arqyly eskertý beredi. Bul fýnktsııa kólik jyldamdyǵy 20 km/saǵattan asqan kezde avtomatty túrde iske qosylady jáne ony tolyq óshirý múmkin emes.
Bul talap — Eýropalyq odaqtyń jol-kólik oqıǵalaryn azaıtý úshin jasalǵan keń aýqymdy sharalarynyń biri. Eýroodaqtyń málimetinshe, júrgizýshiniń nazaryn basqa jaqqa aýdarýy barlyq jol-kólik oqıǵalarynyń 5-25 paıyzyna sebep bolady. Jańa talaptardyń arqasynda 2038 jylǵa deıin 25 myńnan astam adamnyń ómirin saqtap qalýǵa bolady dep kútilip otyr.
Sonymen qatar jańa júıe jeke derekterdiń qorǵalýyna qatysty pikirtalas týǵyzdy.
Qoldanystaǵy talaptarǵa sáıkes, ADDW júıesi «jabyq tsıkl» qaǵıdaty boıynsha jumys isteýge tıis. Júrgizýshiniń bet-beınesi men nazarynyń baǵyty týraly málimetter tek kóliktiń ishinde óńdeledi jáne avtokólik óndirýshilerine nemese úshinshi taraptarǵa berilmeıdi. Sondaı-aq bıometrııalyq derekterdi júrgizýshiniń jeke basyn anyqtaý úshin paıdalanýǵa tyıym salynǵan.
Alaıda All About Cookies portalynyń málimetinshe, qoldanystaǵy zańnamada avtokólik óndirýshileriniń osy talaptardy saqtap otyrǵanyn táýelsiz túrde tekserý mindeti qarastyrylmaǵan. Buǵan qosa jınalǵan derekterdiń qansha ýaqyt saqtalatyny jáne júıe qandaı aqparatty saqtaı alatyny da naqty kórsetilmegen.
Alǵashqy synamalarynda mamandar júıeniń keıde qate eskertý berýi múmkin ekenin de baıqaǵan. Mysaly júrgizýshi ekranǵa nemese jol jıegindegi nysanǵa qysqa ýaqytqa kóz salǵannyń ózinde júıe eskertý jasaýy yqtımal. Júrgizýshi dabyldy ýaqytsha óshire alǵanymen, qozǵaltqysh qaıta iske qosylǵanda nemese júrgizýshiniń nazaryn anyqtamasa, eskertý avtomatty túrde qaıta qosylady.
Jeke derekterdi qorǵaý salasynyń sarapshylary mundaı júıelerge baqylaý júrgizýdiń qıyn ekenin aıtyp otyr. Buǵan deıin keıbir iri avtokólik óndirýshileriniń júrgizýshilerdiń kólik júrgizý daǵdylary týraly málimetterdi derekterdi jınap, satýmen aınalysatyn kompanııalarǵa bergenin kórsetken. Sondaı-aq keıbir jaǵdaıda kompanııa qyzmetkerleri avtokólikterdiń kameralaryna túsirilgen beınejazbalardy zańsyz qaraǵany anyqtalǵan.
Eske salaıyq, buǵan deıin Eýroparlament áýe jolaýshylarynyń quqyqtaryn keńeıtetin jańa erejelerdi maquldaǵan bolatyn.
Qujatqa sáıkes, balamen birge saparlaıtyn jolaýshylar men júrip-turýy shekteýli adamdardy alyp júretin azamattar ushaqtaǵy qatar ornalasqan oryndardy qosymsha aqysyz tańdaı alady.
Maqalanyń túpnusqasyn osy jerden oqı alasyz.
