EO-da Fınlıandııa ǵana ýran óndiretin boldy
BRıÝSSELЬ. QazAqparat – Fınlıandııa úkimeti «Terrafame» ken óndirýshi kompanııasyna ýran óndirýge ruqsat berdi, bul eldi Eýropalyq Odaqtaǵy ýran kenin óndirýshi jalǵyz elge aınaldyrady, dep habarlaıdy QazAqparat menshikti tilshisi EurActiv jýrnalyna silteme jasap.
Buǵan deıin Chehııa men Rýmynııa osyndaı qyzmetterin toqtatqan bolatyn. Bolashaqta fın kompanııasy ýran kontsentratyna ýran shıkizatyn óńdeýdi josparlap otyr. Ol atom elektr stansalaryna otyn óndirýdegi kezeńderdiń birinde qoldanylady.
5 aqpanda berilgen ruqsat Terrafame-ge jylyna 250 tonna ýran óndirýge múmkindik beredi. Degenmen, kompanııanyń baǵalaýy boıynsha, naqty is júzinde óndirý birshama az bolýy da múmkin.
Fınlıandııanyń eki atom elektr stansasy bul sheshimnen paıda kórmeıdi. Ýran kontsentratyn Soltústik Amerıkaǵa nemese basqa Eýropa elderine eksporttaý josparlanýda.
Alaıda, Terrafame eksporttyq qyzmetiniń múmkindigi úshin eldiń Syrtqy ister mınıstrligi men Atom energııasy jónindegi Eýropalyq qoǵamdastyqtan ruqsatty talap etedi.
Óz kezeginde Fın tabıǵat qorǵaý qaýymdastyǵy úkimettiń sheshimine Joǵarǵy ákimshilik sotqa shaǵym túsirýi múmkin. Budan bólek, kompanııa buryn tabıǵatty qorǵaý zańnamasyn buzǵan.
Bul protsestiń barlyǵy birneshe jylǵa sozylýy múmkin, sońǵy sheshim 2022 jyldyń basyna deıin shyqpaýy múmkin.
