EO-da bir jylda 3,9 mln adamǵa turýǵa ruqsat berilip, rekord jańardy
ASTANA. KAZINFORM – Eýropalyq odaq elderi ótken jyly shetel azamattaryna 3,9 mln alǵashqy turýǵa ruqsat qujatyn berip, osy kórsetkish boıynsha 2008 jyldan bergi rekordyn jańartty, dep habarlaıdy Euronews.
Bul – Eýrostat tıisti statıstıkany júrgize bastaǵan 2008 jyldan bergi eń joǵary kórsetkish. 2024 jylmen salystyrǵanda berilgen ruqsat sany 10,1%-ǵa, ıaǵnı shamamen 355 myńǵa artqan.
Jańa ruqsat berýdiń negizgi sebebi jumysqa ornalasý boldy. Onyń úlesi barlyq qujattyń 33,6%-yn qurady. Turýǵa berilgen ruqsattardyń taǵy 28,1%-y otbasylyq jaǵdaılarǵa baılanysty bolsa, 15,5%-y bilim alýǵa berilgen.
Jumys isteýge berilgen ruqsat sany bir jylda 16,1%-ǵa, otbasyn biriktirýge baılanysty ruqsattar 14,1%-ǵa, al bilim alýǵa berilgenderi 9%-ǵa ósken. Basqa negizder boıynsha, sonyń ishinde halyqaralyq qorǵaýǵa baılanysty ruqsat sany 0,9%-ǵa azaıǵan.
2025 jyly alǵashqy turýǵa ruqsatty eń kóp bergen el – Ispanııa. Bul el 635 438 qujat rásimdegen. Ekinshi orynda 605 292 ruqsatpen Germanııa tur. Odan keıin Polsha – 467 314, Italııa – 433 099 jáne Frantsııa – 377 462 ruqsat bergen. Osy bes elge EO-daǵy barlyq jańa ruqsattyń úshten ekisine jýyǵy tıesili.
Ispanııa otbasylyq jaǵdaılarǵa baılanysty berilgen ruqsat sany boıynsha da kósh bastady. Elde bul negizde 275 869 ruqsat berilgen. Bul Ispanııada rásimdelgen barlyq jańa turýǵa ruqsattyń 43,4%-yn quraıdy.
Halyq sanyna shaqqanda eń kóp ruqsatty Malta bergen – ár myń turǵynǵa 57 qujattan keledi. Odan keıin Kıpr – 47 jáne Portýgalııa – 27 ruqsatpen tur. EO boıynsha ortasha kórsetkish ár myń turǵynǵa toǵyz ruqsatty qurady.
Jańa turýǵa ruqsat sanynyń bir jyldaǵy eń joǵary ósimi Portýgalııada tirkeldi – 154,9%. Al Horvatııada bul kórsetkish 43,3%-ǵa, Grekııada 20,6%-ǵa, Aýstrııada 15,5%-ǵa tómendegen.
Azamattyǵy boıynsha EO-da alǵashqy turýǵa ruqsatty eń kóp alǵandar – ýkraındar. Olarǵa 335 096 qujat nemese jalpy kórsetkishtiń 8,7%-y tıesili. Bul qujattardyń shamamen 72%-y Polshada berilgen. Odan keıin Úndistan azamattary – 227 577 jáne Marokko azamattary – 202 054 ruqsatpen tur.
2025 jyldyń sońynda EO elderinde odaqqa kirmeıtin memleketterdiń azamattaryna berilgen qoldanystaǵy turýǵa ruqsattyń jalpy sany 27,8 mln boldy. Qoldanystaǵy ruqsattardyń negizgi sebebi otbasyn biriktirý bolǵan.
Qoldanystaǵy turýǵa ruqsaty eń kóp azamattar Marokkodan – 2,2 mln, Túrkııadan – shamamen 2 mln jáne Ýkraınadan – 1,7 mln adam.
Aıta keteıik, Ispanııa 8 tamyzdan bastap Italııadan keletin jolaýshylardy tekserýdi kúsheıtedi.
Al Seýtadaǵy jaǵdaı Eýropanyń kóshi-qon saıasatyn qalaı ózgertetinin myna jerden oqyńyz.
