EO Brıtanııanyń Eýropalyq Odaqtan qalaı shyǵatyny jaıly túsindirdi
ASTANA. QazAqparat - Maýsym aıynyń 23 kúni ótken referendýmda brıtandyqtardyń 51,9%-y «breksıtti» tańdaýlaryna baılanysty EO Brıtanııanyń Eýropalyq Odaqtan shyǵý tártibiniń egjeı-tegjeıin túsindirdi, - dep habarlaıdy Bı-Bı-Sı.
EO málimdemesine saı, Brıtanııa EO shyǵý tártibi kórsetilgen Lıssabondyq kelisim-shartynyń 50-shi babyn resmı túrde júzege asyrý arqyly, ıaǵnı EO-dan shyǵý jaıynda ne jazbasha, ne aýyzsha habarlaýy tıis.
50-bapty paıdalanǵan kezde ýaqyt eki jyldyq merzimge sozylady jáne bul ýaqytta Brıtanııa EO-dan shyǵýdyń barlyq resmı kelissózderin aıaqtaýy tıis.
50-bapqa saı kelissózder júrgizilgen ýaqyttary Ulybrıtanııa EO-nyń barlyq júrgizilip otyrǵan zańdary men kelisim-sharttarynyń mindettemelerimen tikeleı baılanysty bolady. Alaıda, eki jyl merzim ótkennen keıin Brıtanııanyń EO-ǵa músheligi toqtatylýy múmkin.
Brıtanııa premer mınıstri Devıd Kemeronnyń habarlaýynsha, ol qazan aıyna deıin otstavkaǵa ketip, Eýropalyq Odaqtan shyǵý protsedýrasyn qyrkúıek aıynda ótetin Konservatıvtik partııanyń konferentsııasynda saılanatyn jańa premerge tapsyrmaq.
Jazbasha ne aýyzsha
EO saıasatynyń basymdylyqtaryn anyqtaıtyn organ - Eýropalyq Keńestiń ókili senbi kúni 50-bapty iske qosý Brıtanııanyń Eýropalyq Odaqta bastamashylyq jasaǵan resmı protsedýrasy dep atap aıtty.
50-bapty qozǵaý arqyly EK ókili «Bul shara 50-bapty iske asyrý boıynsha tııanaqty jumys bolý kerek», - dedi.
«Atalǵan shara EK-ke hat jazý arqyly nemese kezdesýdiń resmı stenogrammasynda jazylǵan Eýropalyq Keńes otyrysynda resmı málimdeme jasalýy arqyly atqarylý tıis», - dep qosty EK ókili.
Germanııa Kantsleri Angela Merkel Ulybrıtanııanyń EO músheliginen shyǵýyna baılanysty júrgiziletin kelissózderde EO Brıtanııaǵa dórekilik pen tákápparlyq tanytpaýy jaıly málimdeme jasady.
Onyń aıtýynsha, EO ózge elderdiń shyǵýyn toqtatý máselesi Brıtanııamen júrgiziletin kelissózderde basymdylyq tanytpaý kerek.
Merkel «Shyǵý protsesi uzaqqa sozylmaýy tıis, alaıda men ýaqyt ıntervalyn qysqartýdy da kózdemeımin», - deı otyryp, Brıtanııamen júrgiziletin kelissózderde «jaǵdaıdyń ýshyqpaýyna» úmittenetindigin aıtty.
Referendýmnyń qorytyndysy brıtanııa naryǵynda qarqyndy quldyraýlarǵa ákelip soqty, fýnt 1985 jyldan bergi eń tómengi kórsetkishti kórsetse, jetekshi kompanııalardyń aktsııalary arzandady.
Anglııa Bankiniń basqarýshysy Mark Karnıdiń málimdeýinshe, referendýmnyń qorytyndysy qarjy naryǵy men túgeldeı ekonomıkanyń qubylmalylyǵyna akelip soǵýy múmkin, alaıda aǵylshyn ortalyq banki buǵan daıyn.
