EO barlyq ıt pen mysyqty chıpteýdi mindetti etpek

ASTANA. KAZINFORM – Eýroodaqta úı janýarlaryn – kúshikter men marǵaýlardy – zańsyz tasymaldaýǵa qarsy kúres maqsatynda mindetti túrde chıpteý engizý josparlanǵan, dep habarlaıdy BILD.

Kúshikterdiń zańsyz saýdasy ásirese Germanııaǵa kóptep ákelinetin Rýmynııa, Bolgarııa, Polsha jáne Túrkııa elderinen baıqalady. Janýarlar kóbine aýyryp keledi, egilmegen, anasynan tym erte ajyratylǵan jáne nashar jaǵdaıda ustalady. Úı janýarlary naryǵynyń shamamen 60%-yn zańsyz saýda quraıdy. Bul, bir jaǵynan, satyp alýshylardyń arzan baǵa izdeıtinimen de baılanysty.

Eýroparlament Eýrokomıssııa usynǵan janýarlardy qorǵaýdyń jańa standarttaryn qoldap daýys berdi. Atap aıtqanda, bul standarttar barlyq ıt pen mysyqty chıpteý men olardy satý aldynda eýropalyq tirkeý bazasyna engizýdi mindetteıdi.

Chıpteý narkozsyz jasalady jáne shamamen 50 eýro turady. Kúrish dánindeı kólemdegi transponderler arnaıy shprıtspen ádette moıynnyń sol jaǵyna teri astyna engiziledi. Olar janýarǵa menshik quqyǵyn rastaıtyn 15 tańbaly sáıkestendirý nómirin qamtıdy.

EO-daǵy ekologııa máseleleri jónindegi saıasatker Peter Lıze bul sheshimge rıza ekenin bildirdi.

— Itterdi chıpteý men tirkeý — kúshik saýdasynyń zańsyzdyǵyna qarsy kúrestegi basty qural. Tek osylaı ǵana janýarlardyń shyqqan jerin baqylaýǵa bolady, — dedi ol.

Sondaı-aq, chıpteý janýarlar panajaılaryn da jeńildetýi múmkin dep kútilýde, óıtkeni qashyp ketken nemese joǵalǵan janýarlardy sáıkestendirip, ıelerine qaıtarýǵa múmkindik týady. EO sheshimi boıynsha, satýǵa arnalmaǵan barlyq ıtter de ıeleri tarapynan bes jyl ishinde mindetti túrde chıptelýi tıis.

Sonymen qatar, zań jobasynda medıtsınalyq kórsetkishter bolmasa, janýarlarǵa aýyrtpalyq ákeletin áreketterge — qulaq pen quıryq kesýge — tyıym salý qarastyrylǵan.

Aıta ketelik elimizde úı janýarlarynyń tsıfrlyq pasporty ázirlengeni týraly jazǵan edik.