EO balalardyń TikTok pen Instagram-ǵa kirýine shekteý qoıǵysy keledi
ASTANA. KAZINFORM — Eýropalyq Odaq TikTok pen Instagram áleýmettik jelisin paıdalanýǵa jas shekteýin engizýdi talqylap jatyr, dep habarlaıdy DW.
Usynys Brıýsselde ótken Eýropalyq Odaq kóshbasshylarynyń sammıtinde qabyldanǵan deklaratsııada kórsetilgen.
Bastamanyń negizgi maqsaty — tsıfrlyq keńistikte balalardy qorǵaýdy kúsheıtý jáne áleýmettik platformaǵa táýeldilikti azaıtý.
Eýrokomıssııanyń tóraǵasy Ýrsýla fon der Lıaıen bul shekteýlerdi alkogol men temeki satý erejelerimen salystyra otyryp, áleýmettik jelilerdi tirkeý úshin eń tómengi jasty belgileýge shaqyrdy.
Onyń aıtýynsha, 2024 jyldyń qarashasynda 16 jasqa tolmaǵandar úshin áleýmettik medıany paıdalanýǵa tyıym salǵan álemdegi birinshi el Avstralııa boldy. Bul memleket Eýropalyq Odaq úshin úlgi bola alady.
Eýroodaq elderinde áleýmettik medıany paıdalanýdaǵy jas shekteýlerin engizýdiń ońtaıly mehanızmin talqylaý úshin EO sarapshylar toby jyl sońyna deıin bas qosady dep josparlanǵan.
Jyl basynda Májilis depýtaty Janarbek Áshimjan TikTok-tyń áseri atom bombasynan kem bolmaı turǵanyn aıtyp, ony shekteýdi usyndy.
Aıta keteıik, Germanııada 16 jasqa deıingi balalarǵa TikTok pen Instagram-ǵa tyıym salý usynyldy.