EO arzan taýarlar ımportyna qosymsha alym engizedi
ASTANA. KAZINFORM — Eýropalyq odaq elderi 2026 jylǵy shildeden bastap quny 150 eýroǵa deıingi árbir sálemdemege 3 eýro kóleminde alym salý týraly kelisimge keldi. Bul týraly BILD habarlaıdy.
Basylymnyń málimetinshe, atalǵan sheshim Brıýsselde ótken EO qarjy mınıstrleriniń otyrysynda qabyldanǵan.
Jańa alym Shein, Temu, AliExpress, sondaı-aq Amazon sııaqty onlaın-rıteılerlerge qatysty bolady. Tólemdi ulttyq keden qyzmetteri óndiretin bolady.
Osy ýaqytqa deıin quny 150 eýroǵa deıingi sálemdemeler EO aýmaǵyna kedendik bajsyz engizilip kelgen. Alaıda jańa alym ýaqytsha shara retinde qarastyrylyp otyr, sebebi aldaǵy ýaqytta EO-ǵa ımporttalatyn barlyq taýarlar baǵasyna qaramastan baj salyǵyna tartylýy múmkin.
Habarlamada sońǵy jyldary onlaın-saýdanyń damýy EO-ǵa keletin arzan ári usaq sálemdemeler sanynyń kúrt ósýine ákelgeni atap ótiledi. Eýrokomıssııa deregine sáıkes, 2024 jyly EO-ǵa kúnine shamamen 12 mıllıon sálemdeme jetkizilgen.
Erejelerdi qatańdatýdy Germanııanyń qorshaǵan orta mınıstri Karsten Shnaıder qoldady. Onyń aıtýynsha, bul sheshim ekologııalyq sebeptermen de baılanysty. Mysaly, Germanııaǵa Qytaıdan kúnine 400 myńnan astam sálemdeme keledi. Eýropadaǵy kóptegen platformalardan aıyrmashylyǵy, Temu, Shein jáne AliExpress qaptama qaldyqtaryn qaıta óńdeý úshin tólem jasamaıdy.
Buǵan deıin EO AQSh-tyń Tramp ákimshiliginen alkogol, makaron ónimderi men irimshikke salynatyn baj salyǵynan bosatýdy suraýy múmkin ekeni habarlanǵan edi.