EO Armenııa eksportynyń 80%-yn kedendik bajdan bosatty
ASTANA. KAZINFORM — Eýropalyq odaq Armenııadan eksporttalatyn taýarlardyń 80%-yna óz naryǵyna baj salyǵynsyz shyǵýǵa múmkindik beredi. Bul týraly Eýropalyq komıssııanyń tóraıymy Ýrsýla fon der Lıaıen Erevanda Armenııanyń Premer-mınıstri Nıkol Pashınıanmen kezdesýden keıin málimdedi. Kezdesýge Eýropalyq odaqtyń keńeıý máseleleri jónindegi komıssary Marta Kos ta qatysty.
Ýrsýla fon der Lıaıenniń aıtýynsha, Armenııada jýyrda ótken parlament saılaýy eldegi demokratııanyń beriktigin kórsetti.
— Armenııa halqy reformalar men Eýropalyq odaqpen tyǵyz áriptestikti tańdady. Eshbir memleket óz egemen tańdaýyna baılanysty qysymǵa ushyramaýy tıis. Sondyqtan Eýropalyq odaq Armenııaǵa 52 mıllıon eýro kóleminde qoldaý kórsetip, armıan eksportynyń 80%-yn EO naryǵyna kedendik bajsyz shyǵarýǵa múmkindik beredi. Armenııa bizdiń qoldaýymyzǵa sene alady, — dedi Eýrokomıssııa basshysy.
Jańa saýda jeńildikteri aıasynda Armenııadan eksporttalatyn jańa pisken jemisterdiń 99%-y jáne sýsyndar men alkogol ónimderiniń 91%-dan astamy Eýropalyq odaq naryǵyna kedendik bajsyz jetkiziledi.
EO Armenııaǵa qarjylaı qoldaýyn ulǵaıtady
Eýropalyq odaqtyń Armenııaǵa 52 mıllıon eýro bólý týraly sheshimi maýsym aıynyń basynda jarııalanǵan bolatyn. Osydan keıin eki apta ishinde Erevanǵa 34 mıllıon eýro aýdaryldy. Qalǵan 18 mıllıon eýro jaqyn ýaqytta bólinedi dep kútilýde. Osylaısha, EO-nyń Armenııaǵa kórsetetin jalpy qarjylyq kómegi 288 mıllıon eýroǵa jetedi.
Eýrokomıssııanyń baǵalaýynsha, Armenııa Ońtústik Kavkazdaǵy turaqtylyq pen demokratııalyq ornyqtylyqtyń tiregine aınalǵan.
Sondaı-aq Eýropalyq odaq Armenııa men Ázerbaıjan arasyndaǵy beıbitshilik jolyndaǵy tarıhı ilgerileýdi jáne Armenııa men Túrkııa arasyndaǵy qatynastardyń qalypqa kelý úderisin quptaıtynyn málimdedi.
EO aldaǵy ýaqytta kólik, energetıka jáne tsıfrlyq kommýnıkatsııalar salalaryndaǵy jobalardy qoldaýdy jalǵastyrady. Bul bastamalar óńirdegi uzaq merzimdi beıbitshiliktiń ekonomıkalyq áleýetin iske asyrýǵa jáne halyqtar arasyndaǵy yntymaqtastyqty nyǵaıtýǵa baǵyttalǵan.
Eýrokomıssııanyń málimetinshe, bul jumystar jaqynda iske qosylǵan óńiraralyq «Baılanys platformasy» jáne Ońtústik Kavkazdaǵy kommýnıkatsııalyq jobalardy damytýǵa arnalǵan 200 mıllıon eýrolyq «Beıbitshilik úshin baılanys» baǵdarlamasy aıasynda júzege asady. Atalǵan bastama memlekettik jáne jeke sektordan jalpy kólemi 2 mıllıard eýroǵa deıin ınvestıtsııa tartýǵa múmkindik beredi.
Sonymen qatar Ýrsýla fon der Lıaıen EO bıýdjeti esebinen «Beıbitshilik dıvıdendteri» baǵdarlamasy sheńberinde Armenııa men Ázerbaıjandaǵy jergilikti qaýymdastyqtardy damytýǵa qosymsha 20 mıllıon eýro bólinetinin habarlady.
Bul qarajat densaýlyq saqtaý, mınalardan tazartý, kásibı bilim berý jáne jergilikti kásipkerlikti qoldaý jobalaryna jumsalady.
Buǵan deıin Armenııa men Eýropalyq odaq aldaǵy eki jyl ishinde vızasyz rejım engizý múmkindigin qarastyryp jatqany habarlanǵan bolatyn.
