EO amerıkalyq X platformasyna €120 mln aıyppul saldy

ASTANA. KAZINFORM — Eýropalyq Odaq (EO) amerıkalyq X áleýmettik platformasyn Tsıfrlyq qyzmetter týraly zań (DSA) talaptaryn buzǵany úshin 120 mıllıon eýro mólsherinde aıyppulǵa tartty. Bul týraly Eýropalyq komıssııa habarlady, dep jazady Anadoly.

Habarlamaǵa sáıkes, mıllıarder Ilon Maskqa tıesili X platformasyna EO tsıfrlyq kontent salasyndaǵy erejeler men ashyqtyq talaptaryn oryndamaǵany úshin aıyppul salyndy.

Eýrokomıssııanyń aıtýynsha, sheshim X platformasy kók verıfıkatsııa belgisin durys emes túrde kórsetkeni, jarnama kitaphanasy ashyq bolmaǵany jáne zertteýshilerdiń platformanyń jalpyǵa qoljetimdi málimetterine kire almaýy sebepti qabyldandy.

Atalǵan buzýshylyqtardyń sıpaty, uzaqtyǵy jáne saldary eskerilip, kompanııaǵa 120 mıllıon eýro aıyppul belgilendi.

Eýrokomıssııa bul — DSA talaptaryna sáıkes kelmeý boıynsha aqsha aıyppulymen qabyldanǵan alǵashqy sheshim ekenin atap ótti.

— X platformasy 60 jumys kúni ishinde kók verıfıkatsııa belgisin durys paıdalanýdy qamtamasyz etý úshin túzetý sharalaryn, al 90 jumys kúni ishinde jarnama kitaphanasyn ashyq etý jáne zertteýshilerge málimetterge qoljetimdilikti qamtamasyz etý josparyn usynýy tıis, — delingen habarlamada.

EO elderinde jumys isteıtin iri platformalar Odaqtyń tsıfrlyq erejelerin saqtaýǵa mindetti, al zańbuzýshylarǵa Eýrokomıssııa iri aıyppul sala alady.

Budan buryn Netflix kompanııasy Warner Bros-ty 82,7 mlrd dollarǵa satyp alatynyn jarııalady. Osylaısha eń iri strımıng servısi «Kasablanka», «Garrı Potter» franshızasy sııaqty fılmderdi túsirgen áıgili stýdııamen birigedi