EO alıýmınıı lomy eksportyna 30% baj salyǵyn engizýdi usyndy

ASTANA. KAZINFORM — Eýropalyq Odaqtyń alıýmınıı salasy Eýropalyq komıssııadan metall synyqtarynyń eksportyn toqtatý jáne ishki óndirýshilerde tapshylyqtyń aldyn alý maqsatynda 30 paıyz shamasyndaǵy eksporttyq baj salyǵyn engizýdi surap otyr, dep jazdy Azertadj.

AZƏRTAC agenttigi Reuters-ke silteme jasaı otyryp habarlaǵandaı, European Aluminium salalyq tobynyń málimetinshe, 2024 jyly EO-dan alıýmınıı synyqtarynyń eksporty rekordtyq 1,26 mıllıon tonnaǵa jetken. Bul kórsetkish bes jyl burynǵydan shamamen 50 paıyzǵa joǵary. Eksporttyń basym bóligi Azııa elderine baǵyttalǵan.

Eýropalyq ónerkásip ókilderi jaǵdaıdyń nasharlaýyna Donald Tramp engizgen ımporttyq baj salyǵy sebep bolǵanyn aıtady. Alıýmınııge 50 paıyz, al metall synyqtaryna 15 paıyz kóleminde salyq engizilgen. Bul AQSh-qa metall synyqtaryn ımporttaýdy arttyryp, eksportty qysqartty. Nátıjesinde, azııalyq satyp alýshylar EO-dan jetkizilimge kóbirek táýeldi bola bastady.

European Aluminium kompanııasynyń bas dırektory Pol Voss Eýropa kompanııalary Azııa elderindegi satyp alýshylarmen básekelese almaıtynyn atap ótti. Sebebi olar sýbsıdııalardyń arqasynda joǵary baǵa tóleýge qaýqarly, sonymen qatar ol elderde eńbek pen ekologııalyq standarttar tómen.

— Logıkalyq turǵyda, synyq saýdagerleri kim joǵary baǵa tólese, soǵan satýǵa tyrysady. Alaıda memlekettik saıasattyń mindeti – mundaı naryqtyq aýytqýlardy túzetý jáne Eýropanyń strategııalyq múddelerin qorǵaý, — dedi ol.

EO-nyń atqarýshy komıteti shilde aıynan bastap eksportty baqylaýǵa alǵanyn jáne úshinshi toqsannyń sońyna deıin tıisti sharalar qabyldaý qajettiligine baǵa beretinin málimdedi.

Aıta keteıik, Eýropalyq Odaqqa kirmeıtin birneshe el metall synyqtaryn eksporttaýǵa shekteý engizip úlgerdi. GMK Center konsaltıngtik kompanııasynyń málimetinshe, Úndistan men Qytaıdy qosa alǵanda, 48 el qara metaldar synyqtaryn eksporttaýǵa shekteýler qoıǵan.

Buǵan deıin habarlanǵandaı, Eýropalyq odaq Reseıge qarsy sanktsııalardy uzartty.