EO AQSh-tyń jańa baj salyǵyna ilikpeýden úmitti

ASTANA. KAZINFORM – Eýropalyq Odaq osy aptada AQSh EO elderinen ımporttalatyn taýarlarǵa engizilgen jańa 15 paıyzdyq baj salyǵynan bosatýlardy resmı túrde rastaýyn, sondaı-aq avtokólik ónimderine salynatyn tarıfterdiń tómendetilýin kútýde, dep habarlaıdy Report.

EO AQSh prezıdenti Donald Tramp jazda qol qoıylǵan tarıftik saıasatty jeńildetý týraly kelisimderge zańdy kúsh beretin jarlyqtarǵa qol qoıatynyna úmittenedi. Naqtyraq aıtqanda, avtokólikterge salynatyn baj salyǵyn tómendetý jáne keıbir ónerkásiptik taýarlarǵa, onyń ishinde ushaq bólshekterine qatysty jeńildikter engizý týraly sóz qozǵalyp otyr.

Taraptar Tramp pen Eýropalyq komıssııa tóraıymy Ýrsýla fon der Lıaıen arasyndaǵy buryn jasalǵan saıası kelisimderdi bekitetin birlesken málimdeme jarııalaıdy dep kútilýde.

Bloomberg agenttiginiń habarlaýynsha, endi 15 paıyzdyq baj salyǵy buryn 25 paıyz bolǵan avtokólikterge de qoldanylýy múmkin. Sonymen qatar, EO-dan ákelinetin jartylaı ótkizgishter men dári-dármekter sııaqty ónimderge salynatyn jańa baj salyǵy da qaıta qaralýy yqtımal.

Sondaı-aq EO AQSh-qa belgili bir kólemdegi bolat pen alıýmınııdi qazirgi 50 paıyzdyq mólsherlemeniń ornyna tómendetilgen tarıfpen eksporttaýǵa múmkindik beretin bólek kelisim jasaýǵa umtylýda.

Aıta keteıik, buǵan deıin Tramp Úndistanǵa qatysty tarıfterdi «aıtarlyqtaı» arttyrýdy josparlap otyrǵanyn jazdyq.