ENÝ-da zańsyz kóshi-qon men adam saýdasyna qarsy turý tetikteri talqylandy
Alqaly jıynǵa tóraǵalyq etken atalǵan ýnıversıtet janyndaǵy «Eýrazııa» ǵylymı-zertteý ortalyǵynyń dırektory Zııabek Qabyldınovtyń atap ótýinshe, sharanyń basty maqsaty zańsyz kóshi-qondy aıqyndap, elimizge qandaı qaýip-qater tónetindigin, onyń aldyn qalaı alýǵa bolatyndyǵyn ári zańmen qalaı retteý múmkin ekendigin jaq-jaqty talqylaý.
Jalpy qazirgi ýaqytta Qazaqstan kóshi-qon úderisi belsendi júretin óńirlerdiń birine aınalyp otyr. Ásirese, bul úderis TMD memleketterimen, onyń ishinde Ózbekstan, Reseı, Qyrǵyzstan, Qytaı jáne Mońǵolııamen jıi oryn alýda. Sondyqtan da zańsyz kóshi-qon máselesin retteý búgingi tańda da óz ózektiligin joıǵan joq. Óıtkeni, mıgranttar quqyǵynyń buzylýy ári olardyń quldyqqa salynýy syndy derekter jıi kezdesedi. Máselen, Z.Qabyldınovtyń sózine qaraǵanda, sońǵy 8 jyldyń ishinde Qazaqstanda quldyqqa salýdyń 858 faktisi tirkelgen.
«Ókinishke oraı Qazaqstanda adamdardy quldyqqa salý, adam saýdasy birtindep ósip kele jatqandyǵy baıqalady. Naqty aıtqanda, bizdiń quqy qorǵaý organdarymyz 2009 jyly - 271, 2010 jyly 279 adamdy quldyqqa salý faktisin tirkese, ótken jyly bul kórsetish 287 derekke jetken», - dedi ol.
