Entonı Blınken Dohadaǵy kelissózderde Gazadaǵy atysty toqtatýǵa tyrysyp jatyr
ASTANA. KAZINFORM - AQSh Memlekettik hatshysy Entonı Blınkenniń aıtýynsha, HAMAS tobynyń jetekshileri Gazadaǵy soǵys qımyldaryn toqtatýdy kózdeıtin, kepilge alynǵandar boıynsha usynysqa jaýap berdi, dep habarlaıdy «Amerıka daýysy» radıosy.
Memlekettik hatshy Entonı Blınken seısenbide jasaǵan málimdemesi boıynsha, HAMAS jetekshileri Gazadaǵy soǵys is-qımyldaryn ýaqytsha toqtatýdy kózdeıtin, kepilge alynǵandar týraly kelisimge jazbasha jaýap berdi. Onyń aıtýynsha, Qurama Shtattar HAMAS-tyń jaýabyn qarqyndy túrde zerttep jatyr jáne ony sársenbi kúni Izraıldegi áriptesterimen talqylaıdy.
Dohadaǵy baspasóz máslıhatynda Blınken tilshilerge HAMAS-tyń usynysqa bergen jaýaby Izraılge jetkizilgenin aıtty.
«Biz keplge alynǵandar týraly tek jańartylǵan emes, keńeıtilgen kepil kelisimimen jáne ol ákeletin barlyq artyqshylyqtarmen alǵa jyljý úshin kelisimge qol jetkizýge tyrysamyz», - dedi ol.
Blınken seısenbide Mysyr jáne Katar kóshbasshylarymen Gazada jańa ýaqytsha atysty toqtatý jáne palestınalyq beıbit turǵyndarǵa kóbirek gýmanıtarlyq kómek kórsetý týraly tabandy úndeýler aıasynda kelissózder júrgizdi.
Amerıka Qurama Shtattary, Mysyr jáne Katar qazirgi kezde qarastyrylyp jatqan atysty toqtatý týraly usynysty jasaýǵa kómektesti, oǵan shaıqastardy birneshe aptaǵa toqtatý jáne Gazada HAMAS ustaǵan kepilge alynǵandardy bosatý kiredi.
Blınken Dohada Katar ámiri sheıh Tamım ben Hamad Ál Tanımen jáne Katar premer-mınıstri Mohammed ben Abdýlrahman Ál Tanımen kelissózder júrgizdi.
Ál Tanı tilshilerge HAMAS-tan kepilge alynǵandar boıynsha kelisiminiń jalpy qurylymyna qatysty jaýap alynǵanyn aıtty. Onda keıbir eskertýler bar, biraq alǵanda oń jaýap alynǵan.
Katar premer-mınıstri optımıstik kózqarasyn bildirip, atysty uzaq ýaqytqa toqtatýdyń ornyna kepilge alynǵandardy bosatý «jaqynda» nátıje ákeletinine úmittenetinin aıtty, biraq bul týraly egjeı-tegjeıli aıtýdan bas tartty.
Buǵan deıin Blınken Kaırde Mysyr prezıdenti Abdel-Fattah es-Sısımen kezdesti.
Qarashanyń sońynda jasalǵan buǵan deıingi atysty ýaqytsha toqtatý kelisimi bir aptaǵa sozyldy, sonyń arqasynda Gaza sektoryndaǵy 100-den astam kepilge alynǵan jáne Izraılde ustalǵan 240 palestınalyq tutqyn bosatylǵan.
Eske sala ketsek, Entonı Blınken jaqynda Saýd Arabııasyna kelgen bolatyn. Jaqyn arada ol Taıaý Shyǵystaǵy taǵy birneshe elge barady. Bul HAMAS-tyń Izraılge shabýyly jáne oǵan jaýap retinde «Temir qylyshtar» operatsııasy bastalǵannan beri AQSh Memlekettik hatshysynyń Taıaý Shyǵysqa jasaǵan besinshi sapary.
