Eńsemiz kóterilip qalatyn boldy – ótemaqy kartochkasyn alǵan Arys turǵyny

ARYS. QazAqparat – Ár otbasy múshesine 100 myń teńgeden ótemaqy alý úshin bank kartochkalary qoldaryna tıgen Arys turǵyndary alǵystaryn bildirýde, dep habarlaıdy QazAqparat tilshisi.

«100 myń teńgelik ótemaqynyń kartochkasyn alyp, yrza bolyp bara jatyrmyz. Barynsha qoldaý bildirip jatqan halyqqa, úkimetke rahmet aıtamyn. Shyǵyndar bolyp jatyr. Bári ornymen sheshilip keledi. Eshkimge qapa emespiz. Etek-jeńimiz jıylyp, eńsemiz kóterilip qalatyn boldy», - deıdi úıindegi bes adamǵa 500 myń teńge tıgeli turǵan Arys qalasynyń turǵyny Abaı Moldabekov.

Jarylys bolǵaly beri Arystan attap shyqpaǵan Indýstrııa jáne ınfraqurylymdyq damý vıtse-mınıstri Qaıyrbek Óskenbaev qurylys barysyn kúnde baqylaýǵa alyp, ár sektordyń jumysyn jiti qadaǵalap júr. Onyń aıtýynsha, osy aptada Qaraǵandy, Jambyl, Aqmola oblystary ózderine tıesili sektorlardaǵy jumysyn aıaqtaýǵa jaqyn qalǵan.

«Bir aı buryn kishi aýdanda saý qalǵan birde-bir úı qalmap edi. Búgin kóz toıarlyq jóndeý jumystary júrgizilip jatyr. Taqaýda ǵana bastalǵan úıler 10-15 kúnniń ishinde tolyǵymen bitedi dep sanaımyn. Arys turǵyndaryna aıtarym: kóp tózdińizder – endi kishkene shydaı turyńyzdar. Jumysty túgel bitpeı, eshkim eshqaıda ketpeıdi. Jumystardy tolyǵymen bitirip beremiz», - dedi Qaıyrbek Óskenbaev.

Eske sala ketsek, keshe Arys turǵyndaryna 100 myń teńgeden ótemaqy berý úshin bank kartalary taratyla bastaǵan edi.

«100 myń teńge tirkeýde turǵandarǵa túgel taratylady. Anyqtalǵan 55 myńnan astam adam 12 tamyzdan bastap qarajatqa qol jetkizedi. Búgingi tańda eki aýyldyq eldimeken men Arys qalasyndaǵy 17 sektorda bank kartalary taratylýda. Qyzylorda, Jambyl jáne Shymkent qalasynan «Halyq bankiniń» 120 qyzmetkeri Arysqa arnaıy kelip, jumys júrgizip jatyr», - delingen Túrkistan oblysy ákiminiń baspasóz qyzmetininiń habarlamasynda.

Sondaı-aq, Túrkistan oblysy ákiminiń orynbasary Joldymurat Amanbaev aqshany alýdyń tártibin túsindirgen edi.