Enrıke Iglesıastyń kontserti kezinde «Astana Arena» mańynda kólik qozǵalysy shekteledi
ASTANA. KAZINFORM — Elordada 3 qyrkúıek kúni saǵat 20:00-de álemge áıgili ánshi Enrique Iglesias-tiń kontserti ótedi, dep habarlaıdy Astana qalasy ákimdiginiń resmı saıty.
— Іs-sharaǵa baılanysty qoǵamdyq qaýipsizdikti qamtamasyz etý, kórermenderdiń stadıonǵa jyldam jetýi men qozǵalysyn uıymdastyrý maqsatynda «Astana Arena» stadıony mańynda kólik qozǵalysyna ýaqytsha shekteý qoıylady. Shekteý «Alaý» muz saraıy jaǵynan (Marko Polo kóshesi) jáne «Saryarqa» velotregi jaǵynan (Mesrop Mashtots kóshesi) engiziledi, — delingen habarlamada.
Kontsert qonaqtaryna qolaıly jaǵdaı jasaý jáne kólik qozǵalysyna túsetin salmaqty azaıtý úshin arnaıy shattl avtobýstar uıymdastyrylady.
Saǵat 16:00-den bastap olar qalanyń tórt turaq aımaǵynan «Astana Arena» stadıonyna qaraı qatynaı bastaıdy. Kórermender kóligin turaqqa qaldyryp, stadıonǵa shattl avtobýspen jete alady. Kontsert aıaqtalǵannan keıin shattl avtobýstar kórermenderdi sol turaqtarǵa keri jetkizedi.
Shattl avtobýstar myna mekenjaılardan qatynaıdy:
• Elorda tsırki mańyndaǵy turaq;
• «Áziret Sultan» meshiti mańyndaǵy turaq;
• Qajymuqan kóshesindegi «Qazaqstan» sport kesheni mańyndaǵy turaq;
• «Nur-Sultan» meshiti (Bas meshit) mańyndaǵy turaq.
Sonymen qatar kórermender kontsert ótetin orynǵa tez ári yńǵaıly jetý úshin «Tarlan Astana» jeńil relsti kólik júıesin paıdalana alady.
Júrý baǵytyn aldyn ala josparlap, múmkindiginshe qoǵamdyq kólik nemese shattl baǵyttaryn paıdalanǵan jón. Bul stadıon mańyndaǵy keptelis pen kólik qoıatyn oryn izdeýge baılanysty qıyndyqtardyń aldyn alýǵa múmkindik beredi.
Osydan buryn Astanada KESHYOU kontsertine bıletter eki kúnde satylyp ketkenin jazǵanbyz.
