Enrıke Iglesıastyń Astanadaǵy kontserti qalaı ótti
ASTANA. KAZINFORM – Álemge áıgili ıspan ánshisi Enrıke Iglesıas Astanada kontsert qoıyp, «Astana Arena» stadıonynda tanymal hıtterin oryndady.
Kontsert bastalmaı turyp-aq stadıon mańyna kórermender kóptep jınaldy. Olardyń arasynda ánshiniń shyǵarmashylyǵyn 20 jyldan astam ýaqyt tyńdap kele jatqan jankúıerler de, kontsert úshin basqa elderden arnaıy kelgen qonaqtar da boldy.
Enrıke Iglesıas sahnaǵa shyqqanda kórermender ony zor qoshemetpen qarsy aldy. Kontsert baǵdarlamasyna álemdik charttardyń kóshin bastaǵan Bailamos, Hero, Escape jáne Tonight sekildi tanymal ánder endi.
Ásirese kópshilikke jaqsy tanys hıtterdiń alǵashqy áýeni estilgen sátte stadıon erekshe jandandy. Birneshe býyn ókilderi ánshimen birge án aıtyp, kontsertti úlken mýzykalyq keshke aınaldyrdy.
– Bul kópshilik úshin sheteldik juldyzdyń kezekti kontserti ǵana bolǵan joq. Iglesıastyń ánderi kórermenderge alǵashqy mahabbatty, jastyq shaqty, saıahattar men ómirdiń este qalǵan sátterin eske túsirdi, – dep jazady Kazinform tilshisi.
Ánshi shamamen 1,5 saǵatqa sozylǵan kontsert boıy kórermendermen belsendi baılanys ornatty. Jankúıerler onyń ánderin qosyla oryndap, ár kompozıtsııany qoshemetpen qarsy aldy.
Kontserttiń fınalynda Enrıke Iglesıas qazaqstandyq kórermenderge qazaq tilinde alǵys aıtyp, óner kórsetýin aıaqtady.
Astanadaǵy kontsert ánshiniń Qazaqstanǵa qyrkúıektegi sapary aıasyndaǵy alǵashqy óner kórsetýi boldy. Kelesi kontsert 5 qyrkúıekte Almatydaǵy Ortalyq stadıonda ótedi.
Kontsert aıaqtalǵannan keıin birqatar jas kórermen birden taramaı, ekologııalyq aktsııaǵa qosyldy. Olar stadıon aýmaǵynda qalǵan qoqysty jınaýǵa kómektesti.
Kórermenderdi «Astana Arenaǵa» jetkizý úshin arnaıy shattl baǵyttary da uıymdastyryldy.
Aıta keteıik, buǵan deıin Enrıke Iglesıastyń kontserti kezinde «Astana Arena» mańynda kólik qozǵalysy shekteletini habarlandy.
