«Eńlikgúl» syılyǵyna bıyl 43 teatrdan 140 adam úmitker bolyp otyr - Qazaqstan teatr qaıratkerleri odaǵynyń tóraǵasy
ALMATY. 26 naýryz. QazAqparat - Qazaqstan teatr qaıratkerleri odaǵynyń «Eńlikgúl» syılyǵyna 7 atalym boıynsha bıyl 140 úmitker bolyp otyr. Bul týraly búgin Almatyda ótip jatqan «Qazaqstan teatrlary: búgin jáne bolashaǵy» dep atalatyn respýblıkalyq ǵylymı-tájirıbelik konferentsııada aıtyldy.
«Qazaqstan teatr qaıratkerleri odaǵynyń «Eńlikgúl» syılyǵy baıqaýy 2010 jyldan beri dástúrli túrde jyl saıyn ótkizilip kele jatyr. Bıyl oǵan 43 teatrdan 140 adam úmitker bolyp otyr. Onda jeńimpazdar 7 atalym boıynsha anyqtalady. Olardyń 70-80 paıyzyn aımaqtyq teatrlardyń ókilderi quraıdy», - deıdi odaq tóraǵasy Tuńǵyshbaı Jamanqulov.
Tuńǵyshbaı Qadyrulynyń aıtýynsha, bastapqy jyly «Eńlikgúl» syılyǵynyń laýreattary kýbok pen dıplommen ǵana marapattalyp kelgen bolatyn. 2011 jyly olarǵa 500 myń teńge kóleminde qarjylaı syılyq ta berilgen edi. Al byltyrdan beri onyń kólemi 1 mıllıon teńge kóleminde bolyp otyr. Sondaı-aq arnaıy medal men sertıfıkat ta berile bastady. 2013 jylǵy «Eńlikgúl» syılyǵy ıegerleriniń esimin sarapshylar 27 naýryzda 15.00-de anyqtap, keshke olardyń resmı túrde marapattaıtyn bolady.
