«Eni» kompanııasynyń basshysy munaı baǵasy 200 dollarǵa deıin ósýi múmkin ekenin eskertti
ASTANA. QazAqparat - Birneshe jyldan keıin munaı baǵasy barreline 200 dollarǵa deıin sharyqtap ketýi múmkin, dep málimdedi Davos forýmynda ıtalııandyq «Eni» munaı-gaz kompanııasynyń basshysy Klaýdıo Deskaltsı. Bul týraly RBK habarlady.
-Naryqtaǵy qazirgideı jaǵdaıda OPEK tys qala berse, álem munaı baǵasynyń barreline 200 dollarǵa deıin sharyqtaǵanyn kóretin bolady, - dedi Eni-diń bas dırektory Klaýdıo Deskaltsı.
Onyń aıtýynsha, qazirgi baǵanyń quldyraýy munaı jobalaryna salynatyn ınvestıtsııany aıtarlyqtaı shektep qana qoımaı, keleshekte naryqta usynys azaıyp, tapshylyq bolýy múmkin.
«Kóptegen jobalarymyz - uzaq merzimge arnalǵan. Olar bes nemese alty jyldan keıin óndirýge baǵyttalǵan. Bul - oılanatyn jáıt. Eger qazir kapıtal salymy kúrt qysqaratyn bolsa, tórt-bes jyldan keıin óndiristiń jetispeýshiligine tap bolyp, munaı quny barreline 200 dollarǵa deıin sharyqtap ketýi yqtımal», - dep eskertti ol.
BAQ-qa bergen suhbatynda Deskaltsı baǵa 2015 jyldyń aıaǵyna deıin óse bastaýy múmkin ekenin aıtty.
