Enesiniń toıhanasyn bıýdjet qarjysyna jylytqan sheneýnik kelin jazalandy
QARAǴANDY. QazAqparat - Qaraǵandy oblysy Aqtoǵaı aýdanynda eki jyl boıy enesiniń toıhanasynyń kommýnaldyq tólemderin bıýdjet esebinen tólep kelgen Qyzylaraı aýyldyq okrýginiń ákimi Sheker Tólepbergenovaǵa qatysty iske sheshim shyqty, dep habarlaıdy «QazAqparat» HAA tilshisi.
Bıýdjet qarajatyn jeke múddege paıdalanǵan ákim qyzmetin durys atqarmaǵany úshin tártiptik jazaǵa tartyldy.
Budan tys, sheneýnik kelinniń enesi eki jyldyq memlekettik jylýdyń aqysyn tóleýge mindetti.
«Ákimniń enesi jylýdyń qaryzyn tolyq mólsherde tóleıtini týraly kelisim bar. Esepteýler júrip jatyr, somasyn shyǵaramyz. Sotqa aryz berýge qajettilik joq», - deıdi Aqtoǵaı aýdany ákimdiginiń ekonomıka jáne qarjy bóliminiń basshysy Beket Tileýbergenov.
Sheneýnik aýdan ákiminiń tártiptik jazaǵa tartý týraly buıryǵymen tanysty.
«Biz memlekettik qyzmet isteri jáne sybaılas jemqorlyqqa qarsy is-qımyl departamentiniń Etıka keńesiniń Sheker Tólepbergenovanyń qyzmetine tolyq sáıkes emestigi jónindegi usynysyn oryndadyq», - deıdi Aqtoǵaı aýdany ákimi apparatynyń basshysy Berikbol Ómirqasym.
Atalǵan oqıǵaǵa Qaraǵandy oblysy memlekettik qyzmet isteri jáne sybaılas jemqorlyqqa qarsy is-qımyl departamentiniń qyzmetkerleri tekseris júrgizgen. Onyń qorytyndylaryn Etıka keńesiniń otyrysynda departamenttiń ókili Baqtııar Mákeev jarııalady.
Onyń aıtýynsha, ákimniń enesine tıesili toıhana aýyl ákimdigimen bir ǵımaratta ornalasqan, aýdany 353 sharshy metrdi alyp jatyr.
Departament basshysy Jandos Sársenovtiń tóraǵalyǵymen ótken Etıka keńesiniń músheleri ákimniń osy jemqorlyq áreketi úshin jazalaý qajettigi týraly usynys berdi.
Aıta keteıik, buǵan deıin enesiniń ıeligindegi toıhananyń kommýnaldyq shyǵyndaryn bıýdjet esebinen tólep kelgen aýyl ákiminiń isi tekserilip jatqany týraly habarlaǵan bolatynbyz.
