Energoúnemdeý baǵdarlamasyn engizý qajet - PIK qaýymdastyǵynyń tóraǵasy
STANA. Tamyzdyń 20-sy. QazAqparat /Jasulan Amanbaıuly/ - Jylý jáne energojelilerdiń óndiristik aktıvterin jańartýǵa jáne energoúnemdeý tehnologııalaryn engizýge baǵyttalǵan baǵdarlama ázirleý qajet. Respýblıkalyq PIK qaýymdastyǵynyń tóraǵasy Dınara Ábdirahmanovanyń bul usynysy Astanada «Nur Otan» HDP-niń qalalyq fılıalynda energoúnemdeý júıesiniń damýy taqyrybynda ótken dóńgelek ústel otyrysynda aıtyldy,
dep habarlaıdy QazAqparat.
Basqosýda onyń usynysy biraýyzdan qoldaý tapty. Onyń aıtýynsha, bul mindetti elektr energııasymen qamtamsyz etýshi kompanııalar jáne jergilikti bılik organdary birlesip atqarýy tıis. Jáne onda eskirgen turǵyn úı qorynyń energojelilerin qaıta jańartý jumystary kórinis tabýy kerek.
«Elektr jelileri jańartylǵan árbir turǵyn úıden elektr energııanyń 15 paıyzdyq únemine qol jetkizýge bolady», dep atap kórsetti ol.
Sonymen qatar búgingi tańda jylý energııasyn ysyrap etpeý úshin tutynýshylardy esepteý quraldarmen qamtamasyz etý qajettigi týyndap otyrǵandyǵy sóz boldy. «Jylý esepteý jáne baptap otyratyn quraldar jylýǵa jiberilgen 20-27 paıyz energııanyń únemdelýine septigin tıgzedi. Soǵan baılanysty osyndaı quraldardy ornatý jumysyn qarjylandyrýdy kelesi jylǵy «Jol kartasy» baǵdarlamasyna engizýdi usynamyn», deıdi D. Ábdirahmanova.
«Nur otan» HDP-niń Astana qalalyq fılıaly dóńgelek ústel jıynynda energoúnemdeý júıesiniń damýy, negizgi máseleleri tóńireginde qozǵalǵan usynystardy jınaqtap, tıisti organdar men taraptardyń qaraýyna jiberýdi kózdep otyr. Jıynda elordanyń máslıhat depýtattary, PIK ókilderi, jergilikti organdar jáne BUU-nyń Damý baǵdarlamasynyń óńirlik ókilderi qatysty.
