Energokásiporyndar qyzmetkerleriniń shtattyq sany normatıvteri jańartylady
ASTANA. KAZINFORM — Qazaqstan elektr energetıkalyq qaýymdastyǵy, Energetıka, Ulttyq ekonomıka, Eńbek jáne halyqty áleýmettik qorǵaý mınıstrlikteri energetıkadaǵy personal sanynyń normatıvterin jańartyp, óndiristik protsester men jabdyq erekshelikterin eskere otyryp, kásiporyndardyń kadrlarǵa naqty qajettiligin baǵalap jatyr.
Eńbekti qorǵaý jónindegi respýblıkalyq ǵylymı-zertteý ınstıtýtynyń mamandary júrgizip jatqan zertteý jabdyqqa qyzmet kórsetýge, jóndeý jumystaryn júrgizýge jáne energetıkalyq ınfraqurylymnyń senimdi jumysyn qamtamasyz etýge qansha maman qajet ekenin anyqtaýǵa múmkindik beredi.
Zertteý úshin Astanadaǵy, Aqmola jáne Qaraǵandy oblystaryndaǵy, sondaı-aq Ekibastuzdaǵy pılottyq alańdar tańdaldy. 20 qazannan bastap ınstıtýt mamandary «Astana-Energııa» AQ-nyń JEO-2-sinde hronometrajdyq baqylaýlar júrgizip jatyr.
Olar óndiristik operatsııalardyń uzaqtyǵyn tirkep, qyzmetkerlerdiń fýnktsııalaryn zerdeleıdi, jumys ýaqytyn fotografııalaıdy jáne qyzmetkerlerden suhbat alady. Taldaý basqarý qalqandaryndaǵy jáne tikeleı jabdyq janyndaǵy jumysty qamtıdy. Alynǵan derekter naqty júktemeni eskere otyryp, qyzmetkerlerdiń normatıvtik sanyn anyqtaýǵa kómektesedi.
Normatıvterdi ázirleý kezinde kásiporynnyń aýqymy, jabdyq quramy, otyn túri, avtomattandyrý deńgeıi, elektr jáne jylý jelileriniń uzyndyǵy men tyǵyzdyǵy eskeriledi. Bul formaldy tásilden aýlaq bolýǵa jáne naqty obektilerdiń jumys jaǵdaılaryna sáıkes talaptardy qoldanýǵa múmkindik beredi.
QEQ Tóraǵasy Talǵat Temirhanov energetıkalyq ınfraqurylym damyǵan saıyn bilikti kadrlarǵa degen qajettilik arta beretinin atap ótti.
— Prezıdent Joldaýynda ınfraqurylymdy damytý boıynsha aýqymdy mindetter qoıdy. 2027 jyl Qurylys jyly dep jarııalandy. Demek, bilikti mamandarǵa degen qajettilik arta túsedi. Bul energetıka úshin erekshe ózekti: jańa elektr stantsııalary men jelilerdi salý, qoldanystaǵylaryn jańǵyrtý alda tur. Nysandardy paıdalanýǵa berip qana qoımaı, olardyń ári qaraı senimdi qyzmet etýin qamtamasyz etý mańyzdy. Sondyqtan salaǵa qansha maman qajet bolatynyn búginnen bastap bilýimiz kerek. Úlgilik normatıvterdi ázirleý osy qajettilikti obektıvti derekter negizinde baǵalaýǵa jáne energetıkalyq kásiporyndardy kadrmen qamtamasyz etýdi josparlaýǵa múmkindik beredi — dedi Talǵat Temirhanov.
Pılottyq obektiler qataryna «Astana-Energııa» AQ-nyń JEO-1, JEO-2 jáne aýdandyq qazandyqtary, Qaraǵandy JEO-1 jáne JEO-3, Stepnogor JEO-sy jáne Ekibastuz MAES-1 endi. Zertteýge sondaı-aq «Astana-REK» AQ, «Aqmola Elektrjelilik Úlestirý Kompanııasy» AQ jáne «Qaraǵandy Jaryq» JShS qatysyp otyr.
Energetıka mınıstrligi málimetinshe, zertteýdiń dalalyq kezeńi 2026 jylǵy jeltoqsannyń basyna deıin jalǵasady. Normatıvterdi ózektendirýdi 2027 jylǵy aqpanda aıaqtaý josparlanǵan.
Jańartylǵan normatıvter qajetti shtat sanyn aıqyndaýǵa negiz bolyp, jabdyqqa tıisinshe qyzmet kórsetýge, jóndeý sapasyna jáne energııamen jabdyqtaýdyń senimdiligine yqpal etedi.
Prezıdent «Jańa tarıhı kezeńdegi Qazaqstannyń ózekti mindetteri» atty Joldaýynda elektr energııasymen qamtý máselesin kóterdi. Qasym-Jomart Toqaev energetıkalyq táýelsizdik eldiń básekege qabileti men ekonomıkalyq egemendigin aıqyndaıtyn sheshýshi faktordyń biri dep ataǵan. Osy oraıda qazirgi ahýalǵa sholý jasap kórgen edik.
