Energııany óndirýde klımattyń ózgerýin eskerý kerek - Fınlıandııa mınıstri
ASTANA. QazAqparat - Elordadaǵy Beıbitshilik jáne kelisim saraıynda «EKSPO-2017» kórmesi aıasynda ótip jatqan «Bolashaqtyń energııasyn qalyptastyrý» HІ Eýrazııalyq KAZENERGY forýmynda Fınlıandııanyń qorshaǵan orta jáne energetıka, turǵyn-úı saıasat mınıstri Kımmo Tıılıkaınen álemdik klımatqa qatysty máselelerdi birlese sheshýge shaqyrdy, dep habarlaıdy «QazAqparat» HAA tilshisi.
«Energetıka salasynda álemdik klımattyń ózgerip bara jatqany alańdatady. AQSh-tyń Parıj kelisiminen shyǵý týraly sheshimi, árıne, ókinish týǵyzady. Gambýrgtegi jıynda álemniń 19 eli Parıj kelisiminiń kúshin joıýǵa jatqyzylmaıtynyn málimdegen edi. AQSh-tyń ózinde klımattyń jaǵdaıyna qatysty oń pikir bildirgender bar. Barlyq memleketter qazirgi tańda Parıj kelisimin júzege asyrý úshin birlese jumys atqaryp, mindettemeniń ýaqtyly oryndalýyna kóz jetkizýi kerek. Eýroodaq qashan da bul turǵyda úlgi bolyp keledi. Biz klımattyq salada zańnama ázirlep, ony árdaıym iske asyryp kelemiz. Biraq buny jalǵyz atqarý múmkin emes», - deıdi Fınlıandııa mınıstri.
Kımmo Tıılıkaınenniń aıtýynsha, seriktes elderdi bul baǵytta birlese jumys atqarýy kerek.
«Jalpy búkil álemge klımattyq dıplomatııa aýadaı qajet. Saıası sheshimderdiń mańyzy zor. Bizge ne kerek? Biz klımattyń ózgerýine qatysty eń alǵashqy satyda-aq jumys atqaryp úlgerýimiz tıis. Energetıka, ındýstrııa kómirsýtektik emıssııalardy qysqartý turǵysynda alǵashqy qatarǵa shyǵýy kerek. Kómirsýtekti barynsha qysqartatyn energetkıka kózderin damytqan abzal. Bizdiń kompanııalar energııa óndirýdiń osy salasy arqyly ózara básekelestikterin arttyra alady. Fınlıandııada memleket pen jeke sektor bul baǵytta óte etene jumys atqarady. Álemdik eń sońǵy tehnologııalardy damytý arqyly bıoenergetıka men qaldyqtardy óńdeýdi damytyp kelemiz. Fınlıandııanyń energııa joǵaltý kórsetishi 3 protsentti quraıdy. Energııany tıimdi paıdalanatyn qurylǵylar arqyly osyndaı jetistikke jetýge bolady. Ózge elderde bul kórsetkish 20-30 protsentke deıin jetedi», - dep túıdi Kımmo Tıılıkaınen.
Eske sala ketsek, «Bolashaqtyń energııasyn qalyptastyrý» HІ Eýrazııalyq KAZENERGY forýmyna álemniń irgeli elderiniń energetıka salasynyń mınıstrleri men IEA, MEH, MEF, EEK, IRENA sııaqty iri halyqaralyq uıymdardyń ókilderi qatysýda. Forým barysynda álemdik energetıka kompanııalarynyń turaqty energetıka kózderin tıimdi basqarýǵa, energııa resýrstarynyń óndirilýin, saqtalýyn jáne paıdalanylýyn baqylaýǵa, energııa kózderine qol jetkizýge, klımattyń ózgerýimen jáne kómirqyshqyl gaz shyǵarylyndaryn tómendetýge, balamaly energııa kózderiniń paıdalanylýyn yntalandyrýǵa baılanysty máseleler talqylanyp jatyr.
