Energııamen jabdyqtaýshy uıymdardy taratyp, óńirlik energetıkalyq operatorlardy irilendirý kerek - S. Áıimbetov
ASTANA. QazAqparat - Energııamen jabdyqtaýshy uıymdardy taratyp, óńirlik energetıkalyq operatorlardy irilendirý kerek.
Búgin Májilistegi Úkimet saǵatynda depýtat Seıitsultan Áıimbetov osy máseleni kóterdi.
Depýtat sóz arasynda qazirgi kúni kommýnaldyq qyzmetterge tarıf ósimi qazaqstandyqtardyń áleýmettik kóńil kúıine áser etetinin aıtyp, mundaı qyzmetterdiń baǵasy múldem sharyqtap ketkenin alǵa tartty. S. Áıimbetovtyń aıtýynsha, 2013 jylǵy statıstıkaǵa sáıkes, tarıf baǵasy sýyq sýǵa - 46 paıyzǵa, kárizge - 44 paıyzǵa, kólik qyzmetine -12 paıyzǵa, telefon úshin abonenttik tólem 20 paıyzǵa kóterilgen.
«2014 jyldyń basynda da tarıf ózgerissiz bolmady. Máselen, 1 qańtardan bastap temirjol qyzmetterine tarıfter Qazaqstan boıynsha 7 paıyzǵa ósti, 5 qalada sýyq sýdyń, 4 qalada jylý energııasynyń, 14 óńirde elektr energııasynyń baǵasy kóterildi. Bul rette sońǵy bes jylda elektr energııasyna tarıfterdiń ortasha ósimi basqa kommýnaldyq qyzmetterge qaraǵanda 2 esege asyp tústi», - deıdi S. Áıimbetov.
Sonymen qatar, depýtat ýákiletti organdardyń derekterine súıene otyryp, elektr energııasy boıynsha tarıftiń respýblıkadaǵy orta eseppen alǵandaǵy qurylymyna toqtaldy. Onyń aıtýynsha, elektr energııasyna tarıf mynadaı kórsetkishten quralady: 60 paıyzǵa jýyǵy - tikeleı qýat óndiretin energııa stansasynyń baǵasy, 6 paıyzǵa deıin - ulttyq elektr jelisi boıynsha energııa stansasynan taratýdy jáne oǵan tehnıkalyq qyzmet kórsetýdi uıymdastyratyn júıeli operator - «KEGOC» baǵasy. Eń bastysy, 34 paıyzǵa deıin energııany tutynýshylarǵa deıin tasymaldaıtyn, olarǵa qyzmet kórestýdi júzege asyratyn taratýshy jáne energııamen jabdyqtaýshy uıymdardyń ústemeleri.
«Bul jerdegi suraq aıdan anyq: halyq 34 paıyzǵa tartatyn jabdyqtaý ústemesin ne úshin tóleıdi? Energııamen jabdyqtaýshy uıymdardyń basy artyq qurylymdaryn ustaý ne úshin qajet? Sol sebepti elektr energııasyna tarıf qurylymyn qaıta qaraıtyn jáne energııamen jabdyqtaýshy uıymdardy taratý jáne óńirlik energetıkalyq operatorlardy irilendirý arqyly deldaldyq ústemeni tarıf qurylymynan alyp tastaıtyn kez keldi», - deıdi S. Áıimbetov.
