Energııa únemdeýge qatysty nysanaly baǵdarlama qabyldaǵan mańyzdy - T.Qulybaev
Kezdesý barysynda Tóraǵa daǵdarysqa qarsy kúres máselesin qozǵaı kele, energııa tıimdiligi esebinen kásiporyndardyń qarajaty men qýatyn únemdeý máselesine toqtaldy.
«Álbette, arzan energııa kózderi turǵanda energııa únemdeýge yntalandyrý turmaq, ol jaıynda áńgime aıtý da múmkin emes. Alaıda, daǵdarysqa qarsy sharalar aıasyndaǵy basty pýnktterdiń biri energetıka qýatyn 30 paıyzǵa deıin únemdeý týraly bolyp otyr. Bul rette kórshiles eldegi Qazan qalasynyń energııaúnemdilik júıesin mysalǵa alýǵa da bolar edi, onda júıe engizilgen alǵashqy úsh jylda elektr energııasynyń shyǵyndary úsh esege jýyq qysqardy. Al bizdiń olardan qaı jerimiz kem? Sondyqtan da, energııa únemdeýge qatysty nysanaly baǵdarlama qabyldap, resýrsty únemdeıtin, energııa tıimdiligi joǵary tehnologııalar men qondyrǵylardy engizý kerek. Bul úshin «Energııa únemdeý jáne energııa tıimdiligin arttyrý týraly» zańdy qaıta qarap, is júzinde nátıjeli jumys jasaıtyndaı jaǵdaı jasaý kerek», - dedi Tımýr Qulybaev.
Budan bólek, Tóraǵa jel, kún sekildi energııanyń balama kózderin damytý máselesin qarastyrýdy usyndy. Sondaı-aq, T. Qulybaev eldiń soltústigi men ońtústiginde ınnovatsııalyq hab qurý týraly ıdeıaǵa qoldaý bildirdi.