Energııa únemdeý ulttyq ekonomıkanyń básekege qabilettiligin arttyrady - Albert Raý
ASTANA. 21 jeltoqsan. QazAqparat /Qanat Mámetqazyuly/ - Energııa únemdeý ulttyq ekonomıkanyń básekege qabilettiligin arttyrady.
Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine energııa únemdeý jáne energııa tıimdiligin arttyrý máseleleri boıynsha ózgerister men tolyqtyrýlar engizý týraly» zań jobasy týraly baıandaǵan Indýstrııa jáne jańa tehnologııalar vıtse-mınıstri Albert Raý osylaı málimdedi.
«Qazaqstan ındýstrııalyq-ınnovatsııalyq damý baǵdarlamasy sheńberinde energııa tıimdiligin arttyrý júıesine basa nazar aýdaratyn bolady. Osyǵan oraı, zań jobasy búgingi kúni el damýyndaǵy negizgi ári ózekti máselelerdiń biri bolyp tabylady», - dedi A. Raý. Onyń aıtýynsha, Údemeli ındýstrııalyq-ınnovatsııalyq damý baǵdarlamasynyń negizgi kórsetkishteriniń biri retinde energııa tıimdilik ındıkatorlary atalyp ótiledi. Onyń ishinde ishki jalpy ónimniń energııa qamtymdylyǵyn tómendetý 2015 jylǵa qaraı 10 paıyzǵa, al 2020 jylǵa qaraı 25 paıyzǵa jetýi tıis. «Árıne, bizdiń rezervterimiz zor. Degenmen, Eýropa elderinde jáne bizde shyǵarylatyn jekelegen ónim túrleri boıynsha sarap jasaǵanda Qazaqstandaǵy elektr energııasynyń ónim shyǵarýdaǵy shyǵyndary 4 esege artyq bolyp otyrǵanyn baıqadyq», - deıdi vıtse-mınıstr.
Zań jobasyna sáıkes, energııa únemdeý men energııa tıimdiligin arttyrý salasyndaǵy memelkettik organdar fýnktsııalarynyń arajigin ajyratý arqyly qoldanystaǵy zańnama jetildiriledi. Bul rette Ákimshilik quqyq buzý týraly kodekske energııany únemdeý jáne energııa tıimdiligin arttyrý salasyndaǵy zańnamany buzǵandyǵy úshin jaýaptylyq kózdeledi.
