«Energııa únemdeý týraly» zań kúshine enetin bolsa, jylý energııasyna qatysty kóptegen máseleler sheshiledi - TMRA
ASTANA. 15 jeltoqsan. QazAqparat /Aıdar Ospanalıev/ - «Energııa únemdeý týraly» zań kúshine enetin bolsa, jylý energııasyna qatysty kóptegen máseleler sheshiledi. Bul týraly búgin Bnews.kz portaly arqyly ótken onlaın konferentsııa barysynda Tabıǵı monopolııalardy retteý agenttiginiń tóraǵasy Nurlan Aldabergenov aıtty.
Onyń aıtýynsha, jylý energııasyn únemdeý eń ózekti degen máselelerdiń biri. Sondyqtan energııa únemdegisi keletin azamattarǵa arnaıy eseptegish quraldardy paıdalanǵan óte tıimdi.
«Bul rette máseleniń ekinshi jaǵy bar. Atalmysh quraldar óte qymbat turady. Olardyń baǵasy 160 myńnan 400 myń teńgege deıin qubylady. Árıne, budan ózge de sońǵy úlgidegi avtomattandyrylǵan eseptegish quraldar bar. Olar árıne óte qymbat. Sondyqtan bul másele birneshe jyldan beri ózekti bolyp keldi. Biz qazir onyń jaýabyn tapqan sııaqtymyz. Qazir jylý eseptegish quraldardy «qaltasy qalyń» azamattar esh qıyndyqsyz satyp alady. Al qaltasy kótermeıtin aǵaıyndar úshin onyń aqysyn belgili bir merzimde bólip-bólip tólep alý múmkindigi qarastyrylǵan. Bul ádis iske aspaǵan jaǵdaıda «Energııa únemdeý týraly» zań jobasy daıyndalýda. Onyń talaptaryna sáıkes, jylý eseptegish quraldar zań negizinde qoıylatyn bolady. Ol úshin memleketik nemese jeke menshiktegi kompanııa qurylyp, ol qajetti qurylǵyny ózderi satyp alyp, turǵyndarǵa ornatyp beredi. Sóıtip, biz osy qurylǵylar arqyly energııa únemdeýdi josparlap otyrmyz», -dedi Agenttik tóraǵasy.
Onyń sózine qaraǵanda, bul óte tıimdi shara. Eger ol iske assa, turǵyndar jylýǵa degen qarjyny burynǵy ereje boıynsha tóleı beredi. «Qoryta aıtqanda, «Energııa únemdeý týraly» zańy kúshine ense, kóptegen máseleler sheshiledi. Qazirgi tańda atalmysh qujat daıyndalyp aıaqtalýǵa taıaý», -dedi N.Aldabergenov.
