Energııa únemdeý boıynsha Pavlodar oblysy kósh basynda
ASTANA. QazAqparat - Energııa únemdeý kórsetkishi boıynsha kósh basyna Pavlodar oblysy shyǵyp, tómengi kórsetkishti Almaty qalasy kórsetti, dep habarlaıdy QazAqparat tilshisi.
«Mınıstrlik jyl saıyn energııa únemdeý salasyndaǵy jergilikti atqarýshy organdardyń qyzmetine mynadaı ólshemder boıynsha baǵalaý júrgizedi: ındıkatorlar men mindetterdi oryndaý, memlekettik mekemeler monıtorıngi, bıýdjettik uıymdarda energııa aýdıtin júrgizý, tıimdi jaryqtandyrý kózderine kóshý jáne taǵy basqalar. Ózderińiz kórip otyrǵandaı, Astana qalasyn qosqanda 10 óńirdiń kórsetkishi ortasha. Al, Almaty qalasyn qosqanda 5 óńirde kórsetkish tómen», - dedi Investıtsııalar jáne damý mınıstri Jeńis Qasymbek búgingi Úkimet otyrysynda.
Onyń aıtýynsha, Pavlodar oblysy kásiporyndarynyń energııa únemdeý qyzmetine joǵary baǵa berilgen.
«Onda 2013 jyldan beri energııa únemdeý bólimi jumys isteıdi. Tórt memlekettik-jekemenshik áriptestik jobasynyń ekeýi Pavlodar oblysynda iske asyrylyp jatyr. Bul - Pavlodar men Ekibastuz qalalaryndaǵy kóshe jaryqtandyrýdy jańǵyrtý jobalary. Sondaı-aq, Atyraý men Qyzylorda oblystarynda memlekettik-jekemenshik áriptestik aıasynda bir jobadan iske asyrylyp jatyr. Bul - Atyraý qalasynyń kóshesin jaryqtandyrý jáne Qyzylorda oblysyndaǵy bir orta mekteptiń qazandyǵyn jańǵyrtý jobalary», - deıdi ol.
Mınıstr osyǵan baılanysty Úkimet basshysynan bul baǵyttaǵy jumysty kúsheıtý jóninde tapsyrma berýdi surady.
«Barlyq óńirlerge energııa únemdeý boıynsha, sonyń ishinde memlekettik-jekemenshik áriptestik jobalaryn iske asyrý men energııa únemdeýdi nasıhattaý jumystaryn kúsheıtýdi tapsyrýyńyzdy suraımyz», - dedi Jeńis Qasymbek.
